Рубио во неделата изјави дека оваа недела ќе биде клучна и дека САД мора да одлучат дали ова е потфат во кој сакаат да продолжат и да бидат вклучени
Американскиот државен секретар Марко Рубио го повика рускиот министер за надворешни работи Сергеј Лавров да ја прекине војната во Украина. Американскиот Стејт департмент денеска објави дека Рубио разговарал телефонски со Лавров во неделата на барање на рускиот дипломат, јави ДПА.
„По посетата на Москва на специјалниот пратеник на Белата куќа, Стив Виткоф, на 25 април, државниот секретар му ги нагласи на својот руски колега следните чекори во руско-украинските мировни преговори и потребата од итно завршување на војната. Соединетите Американски Држави се сериозни во врска со олеснувањето на завршувањето на оваа бесмислена војна“,
се вели во соопштението на дипломатскиот оддел.
Рубио во неделата изјави дека оваа недела ќе биде клучна и дека САД мораат да одлучат дали ова е потфат во кој сакаат да продолжат да бидат вклучени.
Американскиот претседател Доналд Трамп се сретна со украинскиот претседател Володимир Зеленски на маргините на погребната служба за папата Франциск во Рим.
За време на враќањето во Соединетите Американски Држави, тој го обвини рускиот претседател Владимир Путин дека не е сериозен во врска со завршувањето на војната и ѝ се закани на Москва со нови санкции.
Вашингтон врши притисок врз Украина да прифати договор за прекин на војната, кој би вклучувал отстапки, и финансиски и територијални, забележува ДПА.