Онколошките пациенти посочија дека продолжуваат да се соочуваат со недостиг на клучни лекови, принудени да се снаоѓаат со приватна набавка или размена меѓу себе
Од друга страна, првиот човек на Фондот за здравство, Сашо Клековски, тврди дека биолошката терапија ја има и вели оти со префрлањето на лековите летрозол и анастрозол од болничка на позитивна листа, тие се достапни во аптеките
Во чест на сите жени кои се борат со ракот на дојка, здружението ХЕМАОНКО, посветено на пациентите со рак и нивните негуватели, со поддршка на „Медикус хелп“, денеска организираше „Розов пикник“ во Градскиот парк во Скопје. Настанот, кој се одржа под мотото „Силни сме кога сме заедно“, обедини жени пациенти од повеќе градови низ земјата.
Онколошките пациенти посочија дека продолжуваат да се соочуваат со недостиг на клучни лекови, принудени да се снаоѓаат со приватна набавка или размена меѓу себе.
Тие велат дека лековите на приватно ги набавуваат од Србија или Косово.
Една од пациентиките посочи дека неизвесноста дали ја има терапијата или дали може да се набави или не е голем проблем и посочи дека лекот летрасан два месеци го немало во аптеките.
Иако таа вели дека моменталната терапија ја има, сепак додава дека е нередовна и оти во некои период таа недостигала по два до три месеци. Ова, според неа, е случај со дел од таблетарната и дел од биолошката терапија.
Од друга страна, првиот човек на Фондот за здравство, Сашо Клековски, тврди дека биолошката терапија ја има.
Тој додава дека со префрлањето на лековите летрозол и анастрозол од болничка на позитивна листа, тие се достапни во аптеките. Според Клековски, станува збор за генерички лекови, од кои има четири брендови регистрирани во Македонија.
„Да почнам од првото, најодговорно тврдам дека недостиг на биолошка терапија нема. Има недостиг на два лека кои се генерички лекови кои сè уште се издаваат на Клиниката за онкологија, за едниот лек производителот од Турција немаше достава, од понеделник треба да го има на Клиниката за онкологија, а вториот лек е во одреден период во дефектура исто производствена, меѓутоа има соодветна замена на клиниката“,
рече Клековски.
Од здружението ХЕМАОНКО потврдуваат дека проблемот често лежи во бизнис интересите на фармацевтските компании.
„Проблемот е што некогаш лекот е навистина евтин и бидејќи бизнисот е важен кога се фармакомпаниите на пазарот дали имаат интерес да го набавуваат тој лек или не. Некогаш имаме и такви проблеми, иако тендерот е објавен, постои тендерската постапка, меѓутоа никој не се пријавува да го добави лекот“,
рече Милица Кузмановска од организацијата.
Ама Марјановиќ од ХЕМАОНКО истакна дека и покрај одредени позитивни чекори, има уште многу работа за подобрување на онколошката грижа.
„Имаме многу работа. Сè уште немаме направено исчекори во промените и во здравствениот систем, и во Законот за здравствена заштита, и во скрининг програмите, и во позитивната листа, па дури и во начинот на кој што онкологија е организирана“,
рече Марјановиќ.
Од здружението „ХЕМА-ОНКО“ потврдуваат дека проблемот често лежи во бизнис интересите на фармацевтските компании.
Таа како чекори напред оваа година ги посочи тоа што хормонската терапија за пациентките со рак на дојка сега е достапна во аптеките блиску до домовите и оти во лекувањето е вклучена нова група пациентки со триплнегатив канцер кои добиле терапија за првпат, која ја подигаат на Клиниката за онкологија.
Марјановиќ нагласи дека во моментов во Македонија не постои задолжителна скрининг програма за рак на дојка, што претставува сериозен проблем.
„Ние веќе преговараме оваа скрининг програма да стане облигаторна за сите граѓани од 40 до 69 години, исто така да стане облигаторна за матичните лекари, односно тие да ја водат грижата за своите пациентки“,
истакна таа.
Целта е да се воспостави ефикасна, реална и долгорочна програма која ќе даде вистински резултати.
„Доколку канцерот се дијагностицира во нулти или во прв стадиум сите знаеме дека прогнозите се извонредни, дека овие пациенти ќе можат да продолжат со својот живот како никогаш да го немале“,
потенцираше Марјановиќ.
Од ХЕМАОНКО укажаа и на потребата пациентките со сомнеж за рак на дојка да се препраќаат директно на Онкологија, а не на хирургија, како и да се набават тумор-бордовите и да се формираат мултидисциплинарни тимови за кои рече дека се веќе во подготовка.
Кузмановска нагласи дека ниска е здравствената култура во државата и дека многу луѓе се плашат од прегледи, што мора да се смени преку превенција и функционална скрининг програма. Таа исто така ја истакна важноста на рехабилитацијата на пациентите со рак.
Дел од присутните на „Розовиот пикник“ реагираа и дека недостига дел од терапијата што ја примаат.
Во насока на подобра информираност, ХЕМАОНКО подготвува и брошура за сите новодијагностицирани пациенти, која ќе содржи детални информации за тоа каде да се обратат, совети за лекување, хемотерапија, помагала и вежби за лимфодема.