Северна Македонија ги спроведе сите реформи. Крајно време е за добро решение, вели германскиот државен министер за Европа
Во 2020 година направивме се што можевме да почнат пристапните преговори со ЕУ на Северна Македонија. ЕУ-интеграцијата на Западен Балкан е гаранција за мир и соработка. Северна Македонија ги спроведе сите реформи. Крајно време е за добро решение, напиша на Твитер германскиот државен министер за Европа Михаел Рот, пренесувајќи анализа на РНД насловена „Долг пат на С Македонија кон ЕУ“.
„Ветениот почеток на пристапните преговори со Северна Македонија во декември очигледно нема да се оствари. Причината за неуспехот не е толку многу во Берлин или Брисел – туку во Бугарија“,
се наведува во текстот, каде што е пренесена изјава на Рот.
Германскиот државен министер за Европа ја обвинува бугарската Влада дека се однесува така што се самоповредува.
„Ако сега не го одржиме зборот и со тоа ги зајакнеме националистичките и популистички сили во регионот, тоа исто така ќе има последици по безбедноста и стабилноста на Бугарија. Со тоа го сечете сопственото месо“,
вели Рот, посочувајќи дека Секое понатамошно двоумење се толкува како слабост на ЕУ.
Рот, претставен и како функционер на СПД, вели дека Германија, како претседавач со ЕУ, прави се за да се осигура дека може да почнат пристапните преговори со првата меѓувладина конференција. Исто така, наведува дека на масата имало добри предлози, и дека „часовникот не е се уште истечен, ама е крајно време за добро решение“.
„Ако сенките на билатералното минато станат аргумент за спречување на заедничка иднина во Европа, тогаш ќе си наштетиме. Северна Македонија и Албанија направија многу далекусежни отстапки – сега ЕУ мора да го одржи својот збор и да го започне процесот на пристапување“,
вели Рот.