Ако ЕУ остави вакуум на Западниот Балкан, во него ќе влетаат други сили, кои не ги делат демократските вредности на ЕУ, вели германскиот министер за Европа, Михаел Рот.
Тој изрази разочарување што немало напредок во интеграцијата на земјите од Западен Балкан за време на претседателството на Германија со Европската унија во изминатите шест месеци.
„Итно ни се потребни позитивни сигнали за Западниот Балкан. Вака нашиот кредибилитет може да биде доведен во прашање“,
рече Рот во разговор со дописникот на германскиот весник „Ханделсблат“ во Брисел.
Рот се надева дека за време на португалското претседателство ќе дојде до напредок.
„Мораме да го протуркаме тоа. Бидејќи мирот, регионалното помирување и демократијата на Западниот Балкан се од централно стратешко значење за цела Европа, особено за блиското соседство“,
вели Рот.
„Ханделсблат“ пишува дека сили како Русија, Кина и Турција се заинтересирани за регионот.
„Ако ЕУ остави вакуум на Западниот Балкан, тогаш други сили, кои не ги делат демократските вредности на ЕУ, од геостратешки причини ќе влетаат во тој вакуум, Сами си пукаме в колено“,
вели тој.
Рот смета дека двоумењето на ЕУ се толкува како слабост во светот во кој авторитаризмот станува се посилен, а демократијата е под се поголем притисок.