Покрај Георгеску, обвинителството обвини уште 21 лице, вклучувајќи го и Хорацио Потра, поранешен француски легионер
Романското обвинителство денеска покрена обвинение против Калин Георгеску, лидерот на екстремната десница и главен кандидат на минатогодишните откажани претседателски избори, за обид за поткопување на националната безбедност.
Обвинителството објави дека доказите покажуваат оти по откажувањето на изборите, Георгеску заедно со Хорацио Потра, поранешен француски легионер, планирале насилни протести, објавија британските медиуми, додавајќи дека не е познато кога ќе започне судењето.
Покрај Георгеску, обвинителството обвини уште 21 лице, вклучувајќи го и Потра.
Обвинителството објави дека Потра, по тајна средба со Георгеску, формирал паравоена група од 21 член која одлучила да оди во главниот град Букурешт за да започне протести со цел да добие широка поддршка од населението против институциите на владеењето на правото.
Главниот обвинител Алекс Флорента изјави дека кривичните истраги откриле серија хибридни напади врз Романија во текот на изминатата година, насочени кон гласачите и ослабувајќи ги државните институции.
Кампањата вклучувала кибернапади, јавни настани и онлајн дезинформации, а Москва негираше вмешаност во кампањата за дезинформации.
Флорента додаде дека Георгеску имал корист од интензивните онлајн кампањи, а податоците покажуваат дека поранешниот претседателски кандидат промовирал содржина во повеќе од 40 онлајн групи познати по ширење дезинформации, со вкупно 1,3 милиони членови.
Романија, членка на ЕУ и на НАТО, ги откажа претседателските избори минатиот декември поради сомневања за руско мешање во корист на Георгеску, кој е остар критичар на НАТО, Брисел и западната поддршка за Украина.
Изборите беа повторени во мај, а на нив победи проевропскиот центрист Никушор Дан.
На Георгеску му е забрането повторно да се кандидира, против него се водат две истраги, а тој негира какво било кривично дело.