Новиот собраниски состав, рече евроамбасадорот денеска во Собранието, треба да ја забрза својата работа и да продолжи со реформите коишто се неопходни за процесот на евроинтеграција на државата, вклучително и уставните измени
Пратеникот и лидерот на опозицискиот СДСМ, Венко Филипче, кој претседава со собранискиот Национален совет за евроинтеграции на седницата рече дека забрзувањето на реформите во клучните области е неопходно за напредокот на државата и дека сите треба да дадат придонес за отворање на првиот кластер
Треба да се искористи моментумот на наклонетост што Европската комисија го има кон Северна Македонија за да се отвори првото поглавје од преговорите за членство во Унијата. Ова е пораката што денеска ја упати шефот на Делегацијата на Европската Унија во земјава, Михалис Рокас, во македонскиот парламент, на заедничката седница на собранискиот Национален совет за евроинтеграции и Комисијата за европски прашања, на чиј дневен ред беше Извештајот на Европската комисија за Република Северна Македонија за 2024 година.
Говорејќи во таа насока, евроамбасадорот во своето обраќање пред членовите на националниот совет и на Комисијата, рече дека сите политички партии треба да придонесуваат за јакнење на улогата на Собранието, како форум за конструктивен и инклузивен политички дијалог, а во насока на забрзување на реформите, неопходни за членство во Европската Унија.
„Би сакал да ве поттикнам да го искористите тековниот момент на наклонетост кон проширувањето. Има вистински моментум, има вистинска посветеност. Од наша страна сме посветени и подготвени да ви помогнеме да го изодите патот кон Европската Унија. Како што сите сведочевте во последните неколку извештаи од Брисел, има голем интерес и благонаклонетост кон Република Северна Македонија да се отвори првото поглавје во преговорите. Новиот претседател на Советот, новиот комесар за проширување и новиот потпретседател на Комисијата (Каја) Калас, сите ја изразија поддршката за вашиот пат кон ЕУ“,
рече евроамбасадорот.
Тој им порача на пратениците да ја искористат оваа можност на најдобар можен начин, пред сè и над сè заради придобивките за граѓаните на земјава кои сакаат да бидат дел од Европската Унија.
Духот на постојана и добра соработка меѓу Собранието и новоизбраниот Европски парламент, според евроамбасадорот, го потврдува и 23. Состанок на Мешовитиот парламентарен комитет кој ќесе одржи во Скопје, како и комуникацијата со новиот известувач за С Македонија во Европскиот парламент, Томас Вајц.
Во своето обраќање, евроамбасадорот укажа дека изборите и именувањата „на одредени позиции во државни институции и агенции треба да бидат навремени и да се темелат на заслуга“, а европското знаменце при донесување закони да се употребува само кога се работи за закони за усогласување со законодавството на Европската Унија.
Новиот собраниски состав, рече Рокас, треба да ја забрза својата работа и да продолжи со реформите коишто се неопходни за процесот на евроинтеграција на државата, вклучително и уставните измени.
„Собранието треба да усвои агенда со која ќе се намали употребата на скратена или итна постапка на закони и да внимава на соодветна употреба на европското знаменце, процедура која беше забележителна во минатото. Употребата на европското знаменце во процедурите треба да биде поврзана само со законите коишто имаат цел усогласување со законодавството на Европската Унија и да се темели на сеопфатни консултации, вклучително и консултации со Европската комисија“,
рече Рокас.
Осврнувајќи се на извештајот на Европската комисија, тој посочи дека десеттиот парламентарен состав го извршил својот мандат главно задоволително, оцени дека имало политичка поларизација и, како што рече, имало одредено задоцнување во однос на назначување на одредени функции во институциите на државата“.
Парламентарните и претседателските избори, како што рече биле компетитивни и се одржале главно во задоволителна атмосфера, но, како што додаде, нотиран е ограничен напредок во однос на препораките на ОБСЕ и Венецијанската комисија и Комисијата за човекови права. Тие, како што порача евроамбасадорот, треба да се имплементираат што е можно поскоро на инклузивен и сеопфатен начин пред следните избори.
„Собранието не успеа да го постигне двотретинското мнозинство потребно да се направат измени во Уставот и да се вклучат граѓаните коишто живеат во границите на оваа држава, меѓу другите и Бугарите. Немаше ни консензус во однос на процесот за усвојување на закони, меѓу кои и законите за реформи во јавната администрација и правобранителот“,
рече Рокас.
Евроамбасадорот во делот на надворешната политика, рече дека зем,јава уште еднаш се покажала како доверлив партнер на Унијата усогласувајќи ја целосно својата надворешна и безбедносна политика со онаа ЕУ и приклучувајќи се кон санкциите на ЕУ кон Руската Федерација.
Заменик-министерката за европски прашања Викторија Трајков во своето излагање на седницата посветена на Извештајот на ЕК за напредокот на државава, истакна дека земјава од Европската комисија добила објективна слика за својата подготвеност во достигнувањето на европските правила и стандарди, како и за тоа што било направено во текот на изминатата година.
Рече оти очекува следниот Извештај да биде подобар.
„Посветено работиме како нова Влада на реформската агенда и очекуваме како Министерство за европски прашања сите релевантни институции кои се вклучени во неа одговорно да ги сработат своите задачи. Имаме добар план и ќе работиме“,
рече Трајков.
Пратеникот и лидерот на опозицискиот СДСМ, Венко Филипче кој претседава со собранискиот Национален совет за евроинтеграции на седницата рече дека забрзувањето на реформите во клучните области е неопходно за напредокот на државата и дека „сите треба да дадат придонес за отворање на првиот кластер“. Филипче најави дека во следниот период ќе има почести седници на ова собраниско тело.
„Ќе бидеме, на некој начин, и контрола и поддршка на Владата во остварувањето на работите што се пред нас, пред сè во делот на реформската агенда. Добро е да се одржува консензусот за членство во Европската Унија. Сметам дека претставници на сите денес присутни политички и економски субјекти ќе дадат свој придонес во работата, поддршка на Владата во остварување на овој процес со цел навистина да се забрза процесот и дека во овој состав на Собранието и во овој мандат ќе се отвори првиот кластер“,
рече Филипче.
Според него, со заедничка работа на ова ниво „дополнително и јавноста и граѓаните ќе се информираат за тоа како ќе се остваруваат чекорите во реформската агенда“.
„Секој од нас има одговорност да придонесе кон овие напори. Овие предизвици бараат зајакнување на институциите и системите, за да станеме што покомпатибилни со законодавството и практиките на Европската Унија“,
кажа Филипче.