Неговиот роднина, адвокатот Асмир Алиспахиќ апелира до институциите, почнувајќи од Управата за извршување на санкции дека треба повеќе да се посветат на притворениците и затворениците со сериозни здравствени проблеми, но и да се подобрат условите, со цел ваквите случаи да не се повторуваат
Притвореник почина вчера во истражниот затвор „Скопје“ во Шуто Оризари, информираа денеска од Министерството за внатрешни работи (МВР). Негови роднини, како што пренесува ТВ Телма, обвинуваат дека тој не добивал соодветна здравствена нега во затворот во Шутка, бидејќи покрај останатите дијагнози, боледувал и од канцер.
Неговиот роднина, адвокатот Асмир Алиспахиќ на социјалната мрежа Фејсбук напиша дека сега починатиот Мирсад Пушка последните пет месеци додека бил во затворот немал соодветна здравствена грижа и покрај тоа што имал болки, поради тешки дијагнози.
„Човекот имаше сериозни дијагнози и требаше секојдневно да прима терапија. Ги знаете условите во затворите, таму нема основни услови за секојдневен живот, а најмалку да примаат терапии, какви што требало да ги прима 24/7 човек со ваква дијагноза“,
вели тој.
Апелира до институциите, почнувајќи од Управата за извршување на санкции дека треба повеќе да се посветат на притворениците и затворениците со сериозни здравствени проблеми, но и да се подобрат условите, со цел ваквите случаи да не се повторуваат.
Од Министерството за внатрешни работи (МВР) денеска соопштија дека вработен во затворот го пријавил случајот во Секторот за внатрешни работи (СВР) Скопје, откако притвореникот побарал лекарска помош.
„Вчера околу 15:30 часот е пријавено дека М.П. од Долно Коњари, што бил во притвор во КПУ Затвор ‘Скопје‘, побарал лекарска помош. Лекар од Итната медицинска помош во 15:58 часот констатирал смрт“,
се вели во соопштението од полицијата.
Директорот на КПУ Затвор „Скопје“ Бобан Утковски за ТВ Телма изјави дека на починатиот притвореник вчера му се слошило, по што е повикана Брза помош, од каде е констатирано дека тој итно треба да се носи во болница.
„Во меѓувреме тој почнал да губи свест, а не помогнале ниту обидите за реанимација“,
вели тој.
Според него, притвореникот секогаш по наредба на судот е спроведуван во болница и враќан назад, оти не бил хоспитализиран.
Од Кривичниот суд соопштија дека биле информирани за различни дијагнози на обвинетиот, но не и дека боледува од канцер.
Оттаму велат дека веќе определената мерка притвор може да се промени по предлог на странките, а од страна на бранителот на обвинетиот таков предлог е поднесен во петокот на 29 август.
За да може да се одлучи по истиот предлог, законот го задолжува судот претходно да добие мислење на надлежен јавен обвинител. Според судот, ова постапување е во таа фаза.
„При сослушување, ниту обвинетиот лично, ниту преку бранителот известиле дека боледува од рак. За време на издржувањето на мерката притвор, од страна на судот, тој редовно и навремено е спроведуван на сите потребни медицински прегледи“,
велат од Судот.
Починатиот притвореник е еден од 36. обвинети во предметот со кодно име „Синдром“, што се однесува на поткуп и други злоупотреби во постапките за издавање на инвалидски пензии и туѓа нега.
Тој е еден од деветмината што на почетокот на истрагата во април годинава добиле ефективен притвор. Оттогаш, бил во затворот во Шутка.