Почетокот на маршот е закажан за 12:05 часот на плоштадот „Македонија“, од каде што ќе продолжи пред Собранието и пред Основниот кривичен суд Скопје, а ќе се одржи на четири дена пред почетокот на судењето за случајот
Родителите за загинатите во пожарот во т.н. кабаре „Пулс“ за в сабота (15 ноември) најавија дека протестниот „Марш на ангелите“, наместо во Кочани ќе го одржат во Скопје. Почетокот на маршот е закажан за 12:05 часот на плоштадот „Македонија“, од каде што ќе продолжи пред Собранието и пред Основниот кривичен суд Скопје.
Во видео објавено на инстаграм-профилот на иницијативата „Кој е следен“, неколкумина од родителите на загинатите во пожарот порачаа дека болката е нивна, но борбата мора да биде заедничка.
„Нашите деца умреа на 16 март. Шеесет и три деца кои никогаш повеќе нема да ги видиме. Не бараме од вас милост, бараме да ни се придружите во борбата за правда, затоа што нашите деца го заслужуваат тоа. Маршираме за вистината. Болката е наша, но борбата е за сите нас. Ни треба ваша поддршка“,
порачаа родителите во видеопораката.
Инаку, иницијативата „Кој е следен“ се формира непосредно по пожарот во Кочани, а два дена по трагедијата, на 18 март, го одржа првиот протестен собир во главниот град, а маршови имаше во текот на целиот месец.
Претстојниот протестен марш на 15 ноември ќе се одржи четири дена пред почетокот на судењето за случајот.