Родителите на осомничениот возач рекоа дека не ја познаваат судијката Даниела Алексовска-Стојановска од Основниот кривичен суд Скопје, која му одреди воспитна мерка на Васил за претходните кривични дела кои се однесуваат на нелегална трговија со дрога
Родителите на Васил Јованов денеска на прес-конференција изразија сочувство до семејството на трагично загинатата Фросина Кулакова. Изразија жалење за несреќата и се понудија доколку на каков било начин можат да им помогнат на семејството и на блиските на Фросина да го сторат тоа.
„Како мајка стојам на располагање на другата мајка ако со што било можам на каков било начин да се најдам во овој претежок период. Немам доволно зборови да ја искажам болката и жалењето за сè што се случува“,
изјави Ана Јованова, мајката на Васил.
Таткото на Васил, Зоран Јованов, инаку офицер во АРМ, рече дека вечерта на несреќата чувствувал потреба да им изрази сочувство на родителите на Фросина, но проценил дека во тој момент може само да ја влоши состојбата.
„Размислував да го направам тоа на самото место кога сфатив дека тоа се нејзините родители, но од нивни блиски се упатуваа закани кон возачот. Проценив дека ако во тој момент пристапам кон родителите најверојатно само ќе ја влошам состојбата, така размислував. Помислив дека е најдобро за неколку дена, но работите отидоа предалеку и немаше простор за лично сочувство, затоа мораме јавно да изразиме сочувство“,
изјави таткото на Васил.
Родителите на осомничениот возач рекоа дека не ја познаваат судијката Даниела Алексовска-Стојановска од Основниот кривичен суд Скопје, која му одреди воспитна мерка на Васил за претходните кривични дела кои се однесуваат на нелегална трговија со дрога.
„Судијката воопшто не ја познавав претходно, ја видов во судница. Од аспект на родител, не направив ама баш ништо за Васил да поминува неказнет низ системот како што беше кажано. Тоа најодговорно го тврдам“,
рече таткото на Васил.
Додаде дека автомобилот што го возеше Васил вечерта на несреќата е на негово име, а оти син му го украл од него.
Адвокатот на Васил, Сашко Дуковски, ги демантираше повеќе наводи изнесени во јавноста во врска со сообраќајната несреќа, кои, меѓу другото, се однесуваат на брзината со која 20-годишникот го управувал возилото. Демантираше и дека на местото на несреќата се чекало да излезе јавен обвинител околу три часа, како што претходно во телевизиско гостување изјави таткото на загинатата Фросина.
„Јавниот обвинител што постапува е пример за обвинител. Дошол на местото на настанот за 20 минути и веднаш се направени сите анализи“,
рече Дуковски.
Во однос на мобилниот телефон што беше пронајден кај Васил во притворот, адвокатот посочи дека нема сознанија, но демантира дека близок член на семејството дал пари за да обезбеди телефон.