Во обвинението на Вишото јавно обвинителство во Белград беше предложено судот да го осуди таткото на затворска казна од 12 години, мајката на две и пол години затвор, додека сопственикот на стрелачкиот клуб и инструкторот во тој клуб да бидат осудени на затворска казна од по три години
На првото главно рочиште од судскиот процес против родителите на момчето кое на 3 мај минатата година застрела и уби девет ученици и училишниот чувар во училиштето „Владислав Рибникар“ во Белград, беше прочитан само обвинителниот акт, имаше воведни зборови на обвинителството и дел на одбраната, пренесува српски Н1.
Рочиштето беше отворено за јавноста, но по барање на обвинителот продолжи зад затворени врати и со исклучена јавност поради заштита на правата на малолетниците оштетени во постапката.
Одлуката наиде на негодување на одбраната на семејството Кецмановиќ, која тврдеше дека нема намера да испрашува деца сведоци и дека целта на одлуката е целиот товар да падне само на едно семејство.
Адвокатката која го застапува семејството Кецмановиќ, Ирина Боровиќ, по рочиштето изјавила дека одлуката на судот да ја исклучи јавноста од судењето на родителите на момчето била избрзана и дека се надева оти судијата Зоран Божовиќ ќе ја преиспита таа одлука.
Според српските медиуми, таткото и мајката на момчето, Владимир и Милјана Кецмановиќ, денеска околу 11 часот влегле во судницата во Палатата на правдата каде што се одржува судењето.
На почетокот на судењето Владимир и Милјана плачеле.
„Владимир со лисици на рацете влегол во судницата и поминал покрај Милјана, кимнувајќи ѝ со главата. Сепак, тие не остварија никаква комуникација“,
пренесуваат дел од српските медиуми.
Во текот на рочиштето родителите на момчето ја негирале својата вина. Вина негираа и сопственикот и вработените во стрелиштето.
Заедно со таткото и мајката, обвинети се и сопственикот и инструкторот на стрелачкиот клуб каде што таткото го носел момчето за да научи да пука.
Во обвинението на Вишото јавно обвинителство во Белград беше предложено судот да го осуди таткото на затворска казна од 12 години, мајката на две и пол години затвор, додека сопственикот на стрелачкиот клуб и инструкторот во тој клуб да бидат осудени на затворски казни од по три години.
Против таткото и мајката се водат и две граѓански постапки по тужби од членови на семејството за нематеријална штета поради смрт на блиско лице.
Обвинителството го товари таткото на момчето за тешко кривично дело против безбедноста бидејќи постои сомнение дека го носел својот син на стрелиште и го обучувал да ракува со оружје, како и дека не го чувал оружјето во согласност со законската обврска, со што момчето извршило масовно убиство со пиштолот на својот татко.
Во основното училиште „Владислав Рибникар“ во мај минатата година се случи масовно убиство во кое 13-годишник К. К. уби девет ученици и чуварот на училиштето.
По вонредниот увид во училиштето „Владислав Рибникар“ се потврдија наодите на Центарот за социјална работа, Министерството за образование и Министерството за семејна грижа, дека во ова училиште немало врсничко насилство во однос на малолетникот. К. К.