Учесниците во маршот, меѓу другото, побараа од ОЈО ГОКК да објасни и да ја информира јавноста до каде е постапката со обвинителниот акт за вработените од МВР
Нашите деца загинаа затоа што системот потфрли, затоа што имало заштитници и соучесници во униформа, порачаа родителите и семејствата на денешниот 20. Марш на ангелите во Кочани.
Пред зградата на Полициската станица тие побараа неселиктивна и транспарентна истрага, а ОЈО ГОКК да објасни и да ја информира јавноста до каде е постапката со обвинителниот акт за вработените од МВР, за коишто велат „сè уште се на слобода, а не со третман каков што заслужуваат нивните постапки“.
Маршот на ангелите денеска почна во 17.05 во Паркот на револцијата, а семејствата на загинатите и на повредените во кочанската дискотека „Пулс“, како и граѓани од Кочани и останатите градови се движеа по познатата рута, поминувајќи низ Трговскиот центар, зградата на Општина Кочани, Полициската станица и завршија пред зградата на Основниот суд и Основно јавно обвинителство во Кочани.
Пред зградата на обвинителството семејствата порачаа дека оваа борба не е само за нивните загубени синови и ќерки, туку дека денеска зборуваат и во име на секое дете во оваа земја.
„Затоа денес јасно и гласно велиме: без независен и некорумпиран судски систем, без инстант политичка одговорност, оваа држава повторно ќе ја изложи младоста на ризик. Вакви трагедии ќе се повторуваат, и тоа е најстрашното сознание. Кој ја одолговлекува постапката? Зошто институциите молчат? Кој ги штити виновните? Нашите деца ги нема, но Вие имате обврска да ја истерате правдата! Ние, родителите, стоиме позади вас – не за да ве штитиме, туку заедно со вас да ја истераме вистинската правда и да докажете дека во Македонија постојат институции кои не се корумпирани и кои работат за граѓаните“,
порачаа родителите пред зградата на Основниот суд и Основното јавно обвинителство во Кочани.
Пожарот во ноќниот клуб „Пулс“ во Кочани се случи на 16 март годинава во раните утрински часови, при што животот го загубија 62 лицa, а речиси 200 беа повредени.
Директорот на Фондот за здравство, Сашо Клековски вчера информираше дека досега е утврдено оти на 18 повредени лица им е потребна пластична хирургија, но сè уште е рано за такви интервенции.
Во меѓувреме три повредени лица од пожарот се на болничко лекување. Од нив, двајца се во Македонија а еден е во Истанбул, Турција. Нивната состојба е критична, но не е животозагрозувачка.