РКЕ алармира дека сегашниот модел е неефикасен, го доведува во прашање квалитетот на услугата, а јавните комунални претпријатија се борат за ликвидност
Регулаторната комисија за енергетика (РКЕ) целосно да ја преземе надлежноста во формирањето на конечната цена на водата. Ова е пораката од тркалезната маса посветена на утврдувањето на тарифите за водни услуги, а организирана од Здружение на даватели на комунални услуги – АДКОМ.
Според податоците презентирани на настанот, актуелниот начин на одредување на цената е сложен, финансиски неодржлив и доведува до несоодветна услуга, што резултира со катастрофални 64 отсто загуби на вода на национално ниво.
РКЕ алармира дека сегашниот модел е неефикасен, го доведува во прашање квалитетот на услугата, а јавните комунални претпријатија се борат за ликвидност.
„Целта на оваа иницијатива е преку интервенции во законските решенија да се создаде поедноставен, транспарентен и стабилен систем за утврдување на тарифите за водни услуги. Предлагаме кратење на бирократскиот процес, од шест во два чекори, со доставување на барање и утврдување на конечна цена“,
вели Лирим Сулејмани, заменик-претседател на РКЕ.
Анализите на РКЕ покажале дека од 79 претпријатија, за 20 се донесени регулаторни одлуки, но советите на општините за 11 од нив не дале согласност. Дополнително, девет јавни комунални претпријатија воопшто не ни поднеле барање за нова цена.
Членот на РКЕ, Фатон Амбари, посочи дека актуелните тарифи не ги покриваат реалните трошоци, принудувајќи ги општините да ги субвенционираат јавните комунални претпријатија, кои работат со загуба. Недостигот на средства спречува инвестиции, што е главната причина за континуираниот раст на загубите поради старата водоводна мрежа.
„Со реализација на оваа иницијатива ќе се создадат предуслови РКЕ да спроведе регулаторни одлуки и мерки, со што ќе се обезбеди самоодржливост на јавните комунални претпријатија на долг рок. Ние дефинираме конечна цена, но предвидуваме и задолжителни средства за инвестиции и го ограничуваме бројот на вработени“,
додава Амбари.
Анализите исто така покажуваат дека иако трошиме поголеми количини на вода, наплатата се намалува, а бројот на вработени во јавните комунални претпријатија се зголемува.