Со калкулаторот, како што истакна првиот човек на РКЕ, Марко Бислимоски, секој потрошувач може да си провери што би значело потрошувачка во блокови, а што би значело постојна ситуација и притоа самиот калкулатор ќе покажува каква е разликата
На прес-конференцијата, професорот Рубин Талески од ФЕИТ посочи дека во забелешките се бара значително промена на границите на блоковите и додаде дека со постојниот модел со четири блока нема да се зголемат сметките за потрошувачите што трошат до 850 киловат-часови струја месечно
Регулаторната комисија за енергетика (РКЕ) денеска го презентираше калкулаторот достапен на веб-страницата на Комисијата, www.erc.org.mk, каде што секој граѓанин може да направи споредба на сметките за струја меѓу постојниот и новиот предлог-тарифен систем со блок-тарифи за високата тарифа на потрошена електрична енергија.
„Со калкулаторот секој потрошувач може да си провери што би значело потрошувачка во блокови, а што би значело постојна ситуација и при тоа самиот калкулатор ќе покажува каква е разликата“,
истакна Бислимоски.
На прес-конференцијата, професорот Рубин Талески од ФЕИТ посочи дека во забелешките се бара значително промена на границите на блоковите и додаде дека со постојниот модел со четири блока нема да се зголемат сметките за потрошувачите што трошат до 850 киловат-часови струја месечно.
Како што истакна, согласно пресметките на Машински факултет за загревање на просечен стан од 60 квадратни метри по сезона просечно се потребни 6 500 киловат часови електрична енергија доколку се грее со термо печка или греалка. Ако е на колективна топлинска пумпа, околу 2 150 киловат-часови, а со инвертер-клима околу 2 400 киловат-часови.
„Притоа, потрошувачката не е исто распоредена во сите месеци, туку е најголема во декември, јануари и февруари кога потрошувачите согласно сегашниот модел би биле во втората и делумно би влегле во третата блок тарифа. Доколку се во првата блок тарифа би плаќале пониски сметки отколку по постојниот тарифен систем, ако се во втората речиси исти, а во третата и четвртата повисоки“,
посочи Талески.
Како што најави првиот човек на РКЕ, Марко Бислимоски, наредната недела Регулаторната комисија ќе одржи уште една јавна дебата за новиот тарифен систем за универзалниот снабдувач, по што ќе ги дефинира рамките на опсегот на четирите блок-тарифи за висока дневна тарифа на електрична енергија и ќе се донесат измените на тарифниот систем.
„Остануваме отворени за сите забелешки и сугестии кои може единствено да одат само во насока на зголемување на опсегот на блоковите, а не на намалување. Во текот на наредната недела ќе се одржи уште една јавна дебата по што ќе се донесе одлуката за промена на тарифниот систем, а потоа и одлуката за новата цена на електричната енергија што ќе важи од 1 јули“,
рече Бислимоски на денешната прес-конференција заедно со професорот Рубин Талески од ФЕИТ.