Во првата фаза, РКЕ ги извести трговците за постоење причини за почнување постапка за одземање лиценци, по што во рок од седум дена три од четирите трговци на големо со мазут доставилe одговор на тоа известување
Регулаторната комисија за енергетика и водни услуги (РКЕ) на денешната седница донесе одлука да даде рок од 90 дена на трговците на големо со мазут – РКМ ДООЕЛ Скопје, Супертрејд ДООЕЛ увоз-извоз Скопје, Пертинакс ДООЕЛ Скопје, Ли оил ДБ ДООЕЛ увоз-извоз Кавадарци со цел да се усогласат со Правилникот за нивото и начинот на пресметка на оперативните резерви.
Со оваа одлука трговците на големо со мазут мора да ги обезбедат потребните количини на оперативни резерви на мазут во своите складови, кои за секој трговец се пресметуваат по методологија утврдена во Правилникот.
„Иако согласно Правилникот се дозволува рок од најмногу шест месеци во кој компанијата ќе го усогласи своето работење со законските прописи, РКЕ го скрати овој рок и ги задолжи трговците на големо за 90 дена да достават доказ – записник од Државниот пазарен инспекторат дека ги поседуваат потребните оперативни резерви на мазут. Доколку по утврдениот рок некој од трговците не ги обезбедат резервите – ќе им биде одземена лиценцата за работа“,
изјави претседателот на РКЕ, Марко Бислимоски.
Во првата фаза, додаде, РКЕ ги извести трговците за постоење на причини за почнување постапка за одземање лиценци, по што во рок од седум дена три од четири трговци на големо со мазут доставија одговор на нашето известување и тоа Ли оил, Супертрејд и РКМ, додека Пертинакс не достави.
„Трговците на големо со мазут во одговорите објаснуваат дека Правилникот за нивото и начинот на пресметка на оперативните резерви што Министерството за економија го донесе во април 2021 година е без период за приспособување на компаниите со новите промени. Трговците објаснуваат дека состојбата со короната ја отежнала работата во тој период и го намалила капацитетот на вработените. Дел од компаниите тврдат дека веќе ги обезбедиле неопходните резерви, а дел побараа и максимален рок од шест месеци за да се усогласат“,
соопштија од Регулаторната комисија.