Латас, исто така во објава на својот фејсбук-профил, ѝ одговори на Ристоска и рече дека најавената тужба против него е можност да се реафирмира целото работење на СЈО, токму преку нејзиниот случај и нејзината тужба
Јавната обвинителка Ленче Ристоска денеска побара од новинарот Драган Павловиќ-Латас да ѝ се извини за јавно искажаните клевети насочени кон неа во телевизиско интервју, како што вели, поради нејзината кандидатура за судијка во Европскиот суд за човекови права (ЕСЧП) во Стразбур. Латас, пак, не само што не ѝ се извини на Ристоска, туку додаде дека таа и другите обвинителки од СЈО, кариерите ги направиле со клеветење неосудени луѓе.
Ристоска на својот фејсбук-профил напиша дека во изминатиот период е цел на неосновани напади и клеветнички изјави токму поради нејзината апликација за кандидатка за нова македонска судијка во Стразбур.
„Упатив барање за јавно извинување до Драган Павловиќ-Латас за клевети искажани во емисијата ‘Само вистина‘ емитувана на ТВ Канал 5 на 16.5.2025 година, во која лажно тврди дека неовластено сум зела износ од 100 000 евра според Агенција за борба против корупција и дека немам ни стаж“,
вели таа.
Причините на барањето за извинување ги темели врз основа на тоа дека Државната комисија за спречување на корупцијата (ДКСК) никогаш нема поведено за неа каква било постапка поврзана со примањата што ги има остварено како обвинител во Специјалното јавно обвинителство (СЈО), како и дека е дел од правосудниот систем уште од 2009 година.
„Причината поради која сметам дека е неопходно да реагирам е што постапката за избор на кандидатите за судија во ЕПСЧ е во сензитивна фаза и Владата на Република Северна Македонија сè уште се нема произнесено по предлогот на комисијата. Ваквиот интенциозен јавен напад, освен штета по мојот интегритет, може да нанесе директна штета во однос на мојата позиција во понатамошниот тек од постапката“,
пишува Ристоска на Фејсбук.
Сепак, додава и дека нема против некој да смета оти други кандидати ја заслужуваат позицијата судија во Европскиот суд за човекови права повеќе од неа.
Но, вели дека во духот на праксата на Европскиот суд за човекови права е неопходно изјавите и коментарите што се даваат во јавноста да бидат засновани на точни и проверени информации, со цел поттикнување на објективна и издржана јавна дебата.
Латас, исто така во објава на својот фејсбук-профил, ѝ одговори на Ристоска и рече дека најавената тужба против него е можност да се реафирмира целото работење на СЈО, токму преку нејзиниот случај и нејзината тужба.
„Ленче Ростоска, обвинителката на СЈО, најавува дека ќе ме тужи за клевета по мојата изјава дека незаконски, како и другите обвинители од СЈО, зела 100 000 евра потпишани од Катица Јанева. Како и дека нема стаж од десет години во правосудството. Тоа лошо ѝ влијаело на кандидатурата за судија во Европскиот суд за човекови права во Стразбур. Океј, ете можност да се реафирмира целото работење на СЈО преку нејзиниот случај и нејзината тужба“,
напиша Латас.
Според него, Ленче Ристоска, со Фатиме Фетаи и Катица Јанева, направиле кариера и пари со клеветење неосудени луѓе.
„Парите што незаконски ги зеле се утврдени со ревизија, со заклучок на Антикорупциска и за тоа има кривична пријава од Вишото обвинителство оценета како основана и се држи во фиока од нејзините колеги од СЈО кои сега го водат скопското обвинителство. Да се реафирмира соработката на СЈО во кое таа беше во врвот, дел од ‘трите грации’ со Љупчо Палевски-Палчо кој ги имаше нивните телефонски разговори и уценуваше луѓе. Има моја кривична пријава за тоа во СЈО која ‘трите грации’ не ја процесираа. Да се реафирмира информацијата за тоа дали и како Ленче Ристоска била дел од ВМРО заедно со Димче Апасиев, зошто и по која цена потоа и двајцата се ставија во служба на прогон токму на ВМРО. Да се реафирмира нејзиниот статус и позиција кај сегашниот државен јавен обвинител Коцевски. Да се преобјават сите интересни детали од пресови и изјави на ‘трите грации’ и Ленче Ристовска од СЈО со клевети и подметнувања спротивно на пресумцијата на невиност. Да се реафирмираат изјавите дека платите на обвинителите во СЈО биле дупло и кусур поголеми од другите обвинители бидејќи тие биле неспособни, неписмени и корумпирани… Кога тираните од УДБА решиле да ги тужат прогонетите на Голи Оток, прогонетите едвај чекаат на јавна сцена конечно да се соочат. И дочекаа“,
пишува во објавата Латас.
Судии, јавни обвинители, но и познати адвокати се наоѓаат на листата на кандидати пријавени за судија во Европскиот суд за човекови права (ЕСЧП) кој треба стапи на функцијата на почетокот на следната година.
На списокот на пријавените се наоѓа и името на јавната обвинителка Ленче Ристоска.