Поголема група жители од селото Оризаре влегле во просториите на ЕВН Куманово со барање да им биде приклучена струјата, пренесува МИА. Вработените во корисничкиот центар повикале полиција и поради безбедносни причини, како што се наведува, ги напуштиле работните места.
Во соопштение од ЕВН го потврдуваат случајот и наведуваат дека до создавање на нормални услови за работа, Корисничкиот енергоцентар на ЕВН – Куманово нема да работи.
Жителите на Оризаре се револтирани што останаа без електрична енергија, откако вчера жители на соседното село Слупчане манипулираа со трафостаниците и предизвикаа хаварија поради што без струја остана липковскиот регион.
Екипите на ЕВН вчера беа спречени да влезат во Слупчане, каде што жителите протестираа и не им дозволија влез во селото блокирајќи го пристапниот пат. Жителите се противат на обидот на ЕВН да ги извади броилата од домовите и да ги постави надвор пред куќите, за да може да има контрола врз нив и да спречи злоупотреба на мрежата и крадење струја.
Денеска министерот за економија Крешник Бектеши ги повика надлежните институции да интервенираат за да се реши проблемот со снабдување со електрична енергија во Слупчане и да им се овозможи на тимовите на ЕВН да работат. Сите граѓани мора да си ги подмируваат сметките за електрична енергија и да платат онолку колку што потрошиле, наведуваат од Министертсвото за економија.
Ова е вторпат жителите на Слупчане да не им дозволуваат на екипи на ЕВН да влезат во селото по неколкудневната блокада што се случи пред неколку недели, кога несовесни мештани го искинаа главниот кабел и предизвикаа сериозен дефект кој ги остави без струја не само Слупчане, туку и трите соседни села.