Според Центрите за контрола и превенција на болести, од почетокот на годината во Соединетите Американски Држави има 1 563 случаи на мали сипаници, што е најголем број во последните 33 години
Повеќе од 150 невакцинирани ученици во Јужна Каролина се ставени во 21-дневен карантин поради контакт со лица заразени со морбили, пренесуваат тамошните здравствени власти.
По епидемиите во Ново Мексико и во Тексас, каде што стотици луѓе се заразени, а тројца починаа, Јужна Каролина станува новото жариште на епидемијата со морбили.
Според Центрите за контрола и превенција на болести, од почетокот на годината во Соединетите Американски Држави има 1 563 случаи на мали сипаници, што е најголем број во последните 33 години.
Децата што се во изолација учат во едно основно и во едно средно училиште во округот Спартанбург, Јужна Каролина.
Одделот за јавно здравје на Јужна Каролина објави дека осмиот случај на мали сипаници е потврден во последните две недели, овој пат во округот Гринвил во северниот дел на државата.
„Ова покажува дека малите сипаници активно се шират во заедницата и ја потврдува важноста на вакцинацијата“,
се вели во соопштението на министерството.
Вакцината ММР (мали сипаници, заушки и рубеола) сè уште е најбезбедниот и најефикасен начин за заштита од болеста. Оваа вакцина обезбедува околу 97 проценти заштита, а исто така штити од потенцијално фатални компликации, како што се пневмонија и енцефалитис.
Случаи на инфекција се регистрирани и во државите Јута (55 лица) и Аризона (63).
Претходно, стотици луѓе се заразија во Западен Тексас и во Ново Мексико, а три лица починаа. Тоа се првите пријавени смртни случаи од мали сипаници во Америка од 2015 година. Повеќето од заразените биле невакцинирани.
Голем број случаи на заразни сипаници се регистрирани и на север, во Канада – особено во Алберта и во Онтарио.
Канадските власти пријавија вкупно 5 024 случаи, три пати повеќе отколку во Америка.
Овие податоци отвораат голем број прашања, како, на пример, како болеста се проширила толку брзо и дали канадските власти преземаат доволно мерки за да ја спречат епидемијата.
Во Америка, зголемувањето на бројот на заразени лица е делумно поврзано со растечкиот скептицизам кон вакцинацијата, кој го поттикнуваат одредени јавни личности.