Новите цени на горивата за кои денеска ќе одлучува Регулаторната комисија за енергетика (РКЕ) ќе стапат во сила од ноќеска на полноќ. Со вчерашното зголемување на цените, пак, единствено поскапи дизел-горивото за два денари за литар, а цените на останатите горива останаа исти
Регулаторната комисија за енергетика (РКЕ) најави дека и денеска ќе носи нова одлука за цените на горивата зашто, како што велат оттаму, исполнети се предусловите за тоа.
„Предусловите се исполнети, РКЕ ќе донесе нова одлука за цената на горивата која ќе биде во сила од вечерва на полноќ“,
изјави за МИА портпаролката на РКЕ, Марина Узунов.
Со вчерашното зголемување на цените единствено поскапи дизел-горивото за два денари за литар, а цените на останатите горива останаа исти.
Па така, денеска литар еуросупер БС-95 чини 107 денари, еуросупер БС-98 се продава по цена од 109 денари. Цената на дизелот е 99,5 денари, а на екстра лесното масло за домаќинство 95,5 денари за литар.
Во последните три дена, откако престана важноста на антикризната мерка за 10 наместо 18 отсто ДДВ за горивата, цената на еуросупер БС-95 се зголеми за 12 денари, а за толку се зголеми и цената на еуросупер БС-98. Цената на дизелот, пак, во овие три дена се покачи за 11 денари.
Со последните измени на Правилникот за одредување на малопродажните цени на нафтените деривати, РКЕ може секој ден да носи одлуки за промена на цените на нафтените деривати доколку пресметката за цената на кој било нафтен дериват оди нагоре или надолу за два денари.