„Денеска за малку ќе бевме сведоци на нов скандал од страна на претседателот на Собранието кој, сакајќи да ја имитира Владата, која секојдневно ги прекршува и Уставот и законите, сакал да свика седница без претходно да биде поднесено барање до мене како претседател на Комисијата за Агенцијата за национална безбедност“, вели претседателот на собраниската Комисија за надзор над работата на Агенцијата за разузнавање и АНБ
Седницата на собраниската Комисија за надзор над работата на Агенцијата за разузнавање (АР) и на Агенцијата за национална безбедност (АНБ) која требаше да се одржи денеска не е одложена, туку е поништена. Ова денеска на прес-конференција го изјави нејзиниот претседател Скендер Реџепи, кој рече дека доколку седницата се одржела тоа ќе било прекршување на Деловникот за работа на Собранието.
Имено, како што кажа Реџепи, кој доаѓа од редовите на опозицискиот „Европски фронт“, предводен од ДУИ, претседателот на Собранието Африм Гаши до него не поднел барање за свикување на седницата, што морало да го направи според Деловникот.
„Денеска за малку ќе бевме сведоци на нов скандал од страна на претседателот на Собранието кој, сакајќи да ја имитира Владата, која секојдневно ги прекршува и Уставот и законите, сакал да свика седница, без претходно да биде поднесено барање до мене како претседател на Комисијата за Агенцијата за национална безбедност“,
рече Реџепи.
Според него, Деловникот во врска со ова прашање е јасен и во членот 126 во него се вели дека седница на работното тело свикува претседателот на работното тело, како и дека тој свикува седница ако тоа го побара претседателот на Собранието или најмалку една третина од членовите на комисијата, кои треба да достават материјал за прашањето што предлагаат да се стави на дневен ред на седницата.
До него, како што вели Реџепи, ниту вчера ниту денеска не пристигнало такво барање од претседателот на Собранието.
„Затоа денешната седница не беше одложена, туку поништена бидејќи е спротивна на Деловникот и седница ќе свикам јас кога за такво нешто ќе има барање. Жално е што станавме банана држава, во која секој секого прислушува и во која секој знае за тоа. Како може премиер да има такви информации дека е прислушувам кога се знае дека државните безбедносни служби класифицираните информации се знае по кој ред на законот се изнесуваат во јавноста и затоа јас нема да бидам дел од еден ваков скандал“,
рече Реџепи додавајќи дека ќе постапува само согласно Деловникот за работа на Собранието.
Одговарајќи на новинарско прашање зошто до него не било доставено барање, Реџепи рече дека вчера ги контактирал сите служби во Собранието и дека претседателот на парламентот денеска морал да ја поништи седницата откако преку координаторот на пратеничката група на „Европскиот фронт“ му пренел на Гаши дека во спротивно ќе поднесе кривична пријава против него.
„Јас имам целосно право да поднесам пријава против него и тоа му го пренесов нему преку нашиот координатор и затоа тој денеска мораше да ја поништи седницата“,
рече Реџепи.
Од кабинетот на претседателот на Собранието Африм Гаши досега не излегоа со официјално образложение зошто денеска не се одржа седницата на Комисијата за надзор над работата на Агенцијата за разузнавање и на Агенцијата за национална безбедност.
Инаку, седницата на Комисијата на која единствена точка на дневен ред беше предолг-заклучокот за вршење надзор над работата на АНБ во просториите на Агенцијата, по наводите за прислушување во периодот од 2019 до 2024 година, претседателот на Собранието ја закажа вчера и со неа требаше да претседава пратеничката од редовите на СДСМ Славјанка Петровска.
Ова дојде откако претходно неделава претседателот на Комисијата, Скендер Реџепи, го одби повикот на пратеникот на ВМРО-ДПМНЕ, Љупчо Пренџов, да свика седница со образложение дека не може да присуствува на неа оти сè уште не му е издаден безбедносен сертификат.
Реџепи и денеска, одговарајќи на новинарско прашање, рече и по поминати 10 или 11 месеци сè уште нема одговор зошто тој и неговиот заменик во ова собраниско тело немаат безбедносен сертификат.