Одговарајќи на новинарско прашање дали за Европската Унија се прифатливи уставни измени со одложено дејство, какви што предлага актуелната власт, претседателката на Европската комисија не одговори прецизно, но рече дека ЕУ ќе помогне да се спроведе преземената обврска на земјава во секој дел од евроинтегративниот пат
Драг Христијан, бидете сигурен дека проширувањето ќе остане врвен приоритет за Европската комисија (ЕК) во следните пет години. Ги имаме сите потребни алатки и инструменти за да го овозможиме тоа.
Ова беше една од пораките во однос на евроинтеграцискиот процес на земјава што денеска од заедничката прес-конференција во Скопје ги упати шефицата на ЕК, Урсула фон дер Лајен, до премиерот Христијан Мицкоски.
Имаме јасна цел, рече Фон дер Лајен, а тоа е што побрзо отворање на првиот кластер „Фундаментални вредности“.
„Речиси сме таму. Треба да поминат уставните промени на коишто вашата држава се согласи да ги направи. Се надевам дека со заеднички дијалог сите политички сили во земјата ќе се здружат и ќе ги преземат потребните одлучни чекори за напредок. Уверена сум дека можеме да ги надминеме пречките коишто сè уште постојат“,
изјави шефицата на ЕК на денешната заедничка прес-конференција со Мицкоски.
Одговарајќи на новинарско прашање дали за Европската Унија се прифатливи уставни измени со одложено дејство, какви што предлага актуелната власт, претседателката на ЕК не одговори прецизно, но рече дека ЕУ ќе помогне да се спроведе преземената обврска на земјава во секој дел од евроинтегративниот пат.
„Мошне важно е што имаме јасна цел. Работам колку што можам за да можеме да ги отвориме преговорите за кластерот ‘Фундаментални вредности’. Тоа е нашата краткорочна цел засега и уставните измени треба да се разработат. Сакам да ве уверам дека ќе бидеме со вас на секој дел од патот за да стигнеме до заедничката цел. Може да сметате на нас. Сакаме да го пишуваме следното поглавје од нашата заедничка иднина заедно“,
порача Фон дер Лајен.
Мислам дека младите луѓе никогаш нема да ни простат ако не одговориме на овој предизвик, рече шефицата на ЕК и додаде: „Затоа треба да направиме С Македонија да биде дел од нашата ЕУ“.