3.000 километри ги делат Мадрид и Штип. Знајни и незнајни титули ги делат Реал Мадрид и овдешните клубови. Но, што знаат соништата што се географија, име и трофејни сали? Пркосејќи и’ на денешницата и логиката, во нив е реално „Сантијаго Бернабе“ да стане дом за дете кое фудбал учело на штипските сокаци и игралишта.
За Реал Мадрид многумина ќе речат дека е голем и поради величината надвор од фудбалскиот терен. За тоа да не биде само излитена фраза, Реал се грижи и во пракса – со тренинзи и работилници. Преку својата Фондација на деца ширум светот им ги отвора портите на „Сантијаго Бернабе“. Под будното око на тренери од Мадрид, изминативе денови тренираа и млади фудбалери од Штип.
Меѓу нив беа и Матеј Ѓоргиев и Ване Крстевски.
„Главниот мотив да се пријавам беше тоа да напредувам, да научам фудбал повеќе со тактика и да стигнам до тимот на Реал Мадрид. Шпанските тренери убаво објаснуваат и ние ги разбираме вежбите, а повеќе сакаат да играат со топката и повеќе да се има посед.“, ни’ открива Матеј.
„Учествувам на овој камп за да напредувам и можеби да одам во Реал Мадрид. Тренинзите на тренерите Шпанци се поразлични од оние што ги имаме во клубот тука во Македонија.“, вели Ване.
Фудбалските клубови денес претставуваат вистински мали универзитети, во кои љубовта кон фудбалот е само една од ставките што се зајакнуваат. Зошто е тоа така, ни откри Карлос – човекот кој ја доби довербата од „Кралскиот клуб“ да ги води тренинзите, и кој го дели презимето со легендарниот голман на Реал Мадрид, Икер.
„Од Мадрид имаме програма во која вклучуваме различни вредности. Продолжуваме со различните активности – едукативни, како и фудбалски. За нас е многу важно на децата да им се допаднат овие вредности, кои всушност ги претставуваат вистинските вредности на Реал Мадрид. Од Кампус Експириенс од Фондацијата на Реал Мадрид носиме лидерство, почит, тимска работа и многу други работи кои би сакале децата да ги научат.“
вели тренерот Касиљас Санчез.
Но, шпанскиот тренер посочува дека не се само младите фудбалери оние што сакаа да се докажат пред очите на менторите од Мадрид.
„Имаме помошници кои се оттука, од Македонија, и ни помагаат со сите активности – со едукативните и со фудбалските. Вистинската помош на овие тренери е нивниот обид да им го пренесат на децата сето она што ние го кажуваме. Ние имаме насоки од Рафа Гарсија Кортес, кој е поранешен фудбалер на Реал Мадрид, кој ни дава програма што ние ја проследуваме на сите овие тренери и помошници.“
вели тој.
Од пријателската насмевка на шпанските тренери прочитавме дека „благодарејќи“ на кодексот на Фондацијата ќе останеме покуси за некои одговори, па се обративме на друга адреса. Влатко Тодев е човек кој љубовта кон фудбалот ја искористил за со своето здружение „Спорт Арена“, лиценциран партнер на Фондацијата „Реал Мадрид“, на македонските млади фудбалери да им ја приближи работата на светските фудбалски великани.
„Морам да бидам искрен, тренерите се презадоволни, секој ден сме во разговори со нив. Како што тие би рекле, разликата помеѓу Шпанија и Македонија е што во Македонија на дечињата очите им светат за фудбал и тренирање, за разлика од Шпанија каде не е до толку. Сите знаеме дека Шпанија е фудбалски великан, но сепак издвојуваат дека за нив е чудно со колкаво внимание го следат тренерот, и како што самиот вели – очите им светат. Едноставно, преголема желба. Таленти секако дека имаме, но мислењето на шпанските тренери е дека иако тој талент децата го имаат, работата со тренерите кои ги учат тие дечиња се малку послаби. И ние во македонскиот фудбал треба да посветиме тука повеќе внимание.“
вели Тодев.
Изминативе денови под лупата на Карлос и колегите поминаа над 180 деца од Скопје, Кавадарци и Штип. Пред Тодев е предизвик наредната година да бидат уште повеќе, а пред младите фудбалери, драгоценото искуство да го покажат на терен.
Во меѓувреме, соништата ќе продолжат да им пркосат на правилата. За тоа најубаво сведочат и желбите на Матеј.
„Ние тренираме за да играме во големите клубови. Ако не сонуваме да играме таму, нема ниту да стигнеме до Реал Мадрид…“