Од Синдикатот предупредуваат дека ваквото квалификување на медиумите од страна на политичарите може да предизвика непријателско однесување кон новинарите и медиумските работници и да ја загрози нивната безбедност. Дополнително, според ССНМ, ваквите изјави се основа за разгорување на и онака кревките етнички односи во земјава
Опасна за слободата на говорот и на медиумите во земјава, вака Самостојниот синдикат на новинари и медиумски работници (ССНМ) ја оцени изјавата на лидерот на ДУИ, Али Ахмети, во која тој на партиската трибина во Гостивар телевизиите Алфа и Телма ги нарекува „непријатели на Албанците“.
Дополнително, додаваат од ССНМ, изјавата на Ахмети е опасна по демократскиот амбиент за кој тој декларативно се залага во изминатите дваесетина години.
„ССНМ го осудува начинот на кој Ахмети очигледно се пресметува со дел од медиумите кои критички пишуваат за политиките и дејствувањето на партијата ДУИ која е дел од владеачкото мнозинство, притоа безобразно злоупотребувајќи го албанскиот народ реферирајќи го кон него наводно ‘непријателско’ дејствување на телевизиите Телма и Алфа“,
се наведува во соопштението на ССНМ.
Од Синдикатот предупредуваат дека ваквото квалификување на медиумите од страна на политичарите може да предизвика непријателско однесување кон новинарите и медиумските работници и да ја загрози нивната безбедност.
„Потсетуваме на слични изјави на високопозиционирани политичари во минатото кои на ист начин, како Ахмети вчера, етикетираа медиуми како непријателски, по што се зголемија нападите врз новинарите медиумските работници“,
додаваат од Синдикатот.
Ваквите изјави, според ССНМ, се основа за разгорување на и онака кревките етнички односи во земјава.
Изјавата на Ахмети претходно остро ја осудија и од Здружението на новинари на Македонија (ЗНМ) и од Агенцијата за аудио и аудиовизуелни медиумски услуги (АВМУ).
Лидерот на ДУИ, Али Ахмети, на синоќешната трибина во Гостивар, порача дека телевизиите Телма и Алфа биле „непријатели на Албанците“.
Говорејќи за судирот во редовите на партијата, каде што група партиски функционери предводени од поранешниот градоначалник на Чаир, Изет Меџити, остро се спротиставува на неговите најблиски соработници, пред сè на вицепремиерот Артан Груби и министерот за надворешни работи Бујар Османи, Ахмети повика на единство и смирување на страстите.
„Кому му служиме со овие поделби што се прават? Се разбира, на непријателите на Албанците, тие аплаудираат, Алфа, Телма, мелма, тоа се тие. Што добија Албанците кои беа поделени во минатото, што? Не добија ништо“,
рече Ахмети.
По реакциите во јавноста се огласија од ДУИ од каде што објаснуваат дека Ахмети не спомнал непријателски медиуми, туку агресивни непријателски тонови од страна на граѓаните.