Разрешениот директор на Неврологија, Игор Кузмановски, ќе плати казна од 500 до 1 000 евра за работа со необновена лекарска лиценца

По наредба од Министерството за здравство, ДСЗИ извршил вонреден инспекциски надзор на Клиниката за неврологија во врска со работата на Кузмановски како директор на клиниката и како здравствен работник. Притоа, било констатирано дека откако бил именуван на функцијата директор нема податоци дека давал здравствени услуги, но оти од 15.03.2025 година, до кога му била важечка лиценцата, па до назначувањето на директорската позиција извршувал здравствена дејност

Разрешениот директор на Клиниката за неврологија проф. д-р Игор Кузмановски, треба да плати парична казна (глоба во износ од 500 до 1 000 евра), бидејќи како здравствен работник работел без важечка лиценца за работа, соопшти денеска Државниот санитарен и здравствен инспекторат (ДСЗИ).

По наредба од Министерството за здравство, ДСЗИ извршил вонреден инспекциски надзор на Клиниката за неврологија во врска со работата на Кузмановски како директор на клиниката и како здравствен работник. Притоа, било констатирано дека откако бил именуван на функцијата директор нема податоци дека давал здравствени услуги, но оти од 15.03.2025 година до кога му била важечка лиценцата, па до назначувањето на директорската позиција извршувал здравствена дејност. За ова Кузмановски ќе биде прекршочно парично казнет, а таква казна ќе има и за правното лице и за одговорно лице во правното лице.

„На ден 14.10.2025 година извршен е вонреден инспекциски надзор во ЈЗУ УК за Неврологија Скопје по издадена наредба од Министер за здравство бр. 17-9871/1 од 14.10.2025 година до Државниот санитарен и здравствен инспекторат, а во врска со неговата работа како директор на клиниката и како здравствен работник“,
информираат од Министерството за здравство.

Согласно надлежностите на Државниот санитарен и здравствен инспекторат, велат оттаму, извршен е увид во персоналното досие на именуваниот и останатата документација на клиниката во врска со предметот на инспекцискиот надзор.

„При надзорот е констатирана следната фактичката состојба: Со решение од Министерство за здравство бр.11-8171/1 од 07.08.2025г. проф. д-р Игор Кузмановски е именуван за в.д. директор на ЈЗУ УК за Неврологија Скопје. Врз основа на решението, од страна на Управниот одбор на клиниката (УО) донесено е решение бр.0402-1885/1 од 21.08.2025г. за мирување на работното место на проф.д-р Игор Кузмановски доктор специјалист невролог раководител на Оддел за развојна неврологија сметано од 08.08.2025 година. Според календарот на активности во интегрираниот информатички систем ‘Мој Термин’ за сите доктори специјалисти вработени во ЈЗУ УК за Неврологија Скопје за периодот од 01.01.2025г година заклучно со 30.11.2025 година се констатира дека д-р Кузмановски обавувал здравствена дејност до 08.08.2025 год. Со назначувањето на в.д. дирекор не се евидентирани здравствени услуги реализирани од негова страна. Од увидот во персоналното досие утврдено е дека има последна лиценца за работа издадена од Лекарска комора (ЛК) на Република Македонија бр. 0009786 со важност до 15.03.2025 година. Од тој датум до денот на назначување на в.д. директор проф. д-р Игор Кузмановски обавувал здравствена дејност“,
се појаснува во соопштението.

Од ДСЗИ велат дека во врска со работата на проф.д-р Игор Кузмановски како здравствен работник без важечка лиценца за работа ќе му биде издаден прекршочен платен налог според член 309 став 1 точка 1 од Законот за здравствената заштита, но оти ќе следи и прекршочен платен налог за правното лице и за одговорно лице во правното лице, односно претходниот директор.

„Од увидот во персоналните досиеја на останатите доктори, вкупно 33, се констатира дека сите лиценци се во рок на важност. За сите констатирани недостатоци во однос на работата на ЈЗУ УК за Неврологија Скопје, ќе биде издадено решение за наредба за отстранување на недостатоците“,
додаваат од ДСЗИ.

Министерот за здравство Азир Алиу на 10 октомври го разреши д-р Кузмановски откако на социјалните мрежи се појави видео во кое Кузмановски во домашна атмосфера меша бела прашкаста материја во чинија, зборува за неа со асоцијација за кокаин и разговара со друго лице.