Во врска со одлуката за притворот за случајот на СЈО, „Труст“, претходно Јово Вангеловски беше „симнат“ од кормилото на Врховниот суд
Врховниот судија Ристо Катавеновски е разрешен од судиската функција на денешната седница на Судскиот совет. Тој е еден од тројцата судии кои пролетта 2017 година го обезбедија мнозинството за укинување на притворот за бизнисменот Сеад Кочан, додека тој беше во бегство, најверојатно надвор од земјава.
Кочан веќе половина година ја отслужува затворската казна од четири години и осум месеци за случајот на СЈО, „Труст“, поврзан со учество во тендери на ЕЛЕМ. Денеска, пак, од функцијата е разрешен и последниот судија од Врховен суд кој овозможи укинување на мерката притвор за бизнисменот, за кој имаше распишано и меѓународна потерница.
Од Судскиот совет нема официјална потврда дека станува збор за Катавеновски. Претседателот на Судскиот совет Киро Здравев изјави дека не може да каже кој судија е разрешен бидејќи јавноста беше исклучена за оваа точка. „Телма“ објави дека разрешениот е Катавеновски, за кого се водеше постапка за нестручно и несовесно работење.
Со образложение дека станува збор за здравствени причини, постапката во Судскиот совет за Катавеновски беше издвоена. Пред неколку месеци беа разрешени и другите двајца судии кои учествуваа во гласањето за укинување на притворот за Кочан. Од функцијата замина врховната судијка Рахилка Стојковска, како и Јово Вангеловски, кој во два мандата беше избиран за претседател на највисокиот суд во земјава.
Службената информација од денешната седница на Судскиот совет е дека еден судија е разрешен поради нестручно и несовесно вршење на функцијата, а за тројца судии постапката е запрена. За еден судија е одлучено извештајот да се дополни со податоци кои се неопходни за Советот да може одлучи.
На денешната седница, беше присутен и членот на Судскиот совет Зоран Теофиловски за кого Обвинителството бараше притвор. Во врска со присуството на Теофиловски, Здравев рече дека не е точно дека ги штитат членовите на Судскиот совет.
„Досега беше прифатено барањето за одземање на имунитетот не само на членот на Судски совет туку претходно и за неколку судии против кои беше поднесено барање за покренување кривична постапка за одговорност за конкретни кривични дела. Ние тогаш го одзедовме имунитетот, меѓутоа не дадовме согласност за притвор и за судиите и за член на Судскиот совет“,
вели Здравев.
Здравев информира дека ги испратиле податоците што им ги побара Антикорупциската комисија во насока на градење методологијата кои судии ќе бидат проверувани.
„Очигледно дека ќе треба Судскиот совет и ДКСК да ги синхронизираат постапките во врска со евентуално барање за утврдување одговорност на судии. Судскиот совет постапува и одлучува по барање за утврдување одговорност на судија од аспект на совесност и стручно постапување и од аспект на почитување на морално – етичките норми, но не може да навлегува во испитување на имотната состојба на судиите.