Уште се трага по напаѓачите, а од МНР велат дека службите на двете земји се во постојана комуникација и разменуваат информации во полза на истрагата и расчистувањето на случајот
Министерството за надворешни работи информира дека ранетиот Сеад Слезовиќ е во стабилна состојба по вчерашното пукање на Халкидики, Грција, во кое загина неговиот пријател Орхан Бајрами-Оки.
„Според информациите добиени од Генералниот конзулат во Солун, кој е во редовна комуникација со болницата каде што е хоспитализиран повредениот од вчерашниот инцидент во Халкидики, тој е во стабилна состојба и е надвор од животна опасност. Дипломатско-конзуларната мрежа на Северна Македонија во Грција е активна, и покрај редовните известувања, стои на располагање и за евентуални потреби на нашите институции“,
велат од МНР.
Грчката полиција уште трага по напаѓачите, а од МНР велат дека службите на двете земји се во постојана комуникација и разменуваат информации во полза на истрагата и расчистување на случајот.
Претходно објавивме дека полицајци кои сакале да останат анонимни, бидејќи не се овластени да зборуваат официјално за случајот, за Асошиејтед прес изјавиле дека веруваат оти станува збор за нарачано убиство.
Досега е познато дека две маскирани лица на мотоцикл, вчера околу 3:30 часот утрото, се приближиле до вилата во Ханиоти, која Оки ја изнајмувал заедно со пријателите, и испукале најмалку 19 куршуми, при што тој е убиен, а со повреди е хоспитализиран еден од неговите пријатели – 45-годишниот пријател Сеад Слезовиќ.
Жртвата Орхан Бајрами-Оки е претставен како сопственик на казино, вклучен и во бизниси со трговија на пијалаци. Домашните медиуми јавија дека тој е неформален водач на криминалната група Дуќанџик.
Според порталот 4NEWS.mk, вчерашното убиство Оки било претходно најавено на платформата Тик-ток. Профилот од кој била најавена ликвидацијата повеќе не е достапен. Таму, наводно, повеќе од една година биле најавувани и други ликвидации.