До јуни ќе продолжиме да бидеме на линија со Северна Македонија, кога сметаме двете земји треба да добијат зелено светло. Ако Бугарија го блокира патот во јуни, ќе бараме да не разделат затоа што е невозможно долго да се соочуваме, изјави албанскиот премиер на прес-конференцијата со германскиот канцелар Олаф Шолц
Албанскиот премиер Еди Рама денеска уште еднаш истакна дека Албанија ќе се одвои од Северна Македонија доколку во јуни формално не се отворат преговорите со ЕУ.
„Во случајот со одвојувањето на Албанија од Северна Македонија, одговорот е позитивен: 65 отсто од албанските граѓани кои учествува во националната анкета. Тоа ќе се случи од наша страна само доколку во јуни формално не се отворат преговорите за Албанија поради Бугарија. До јуни ќе продолжиме да бидеме на линија со Северна Македонија, кога сметаме двете земји треба да добијат зелено светло. Ако Бугарија го блокира патот во јуни, ќе бараме да не разделат затоа што е невозможно долго да се соочуваме“,
изјави Рама на заедничката прес – конференција во Берлин, со германскиот канцелар Олаф Шолц, јави МИА, повикувајќи се на албанските медиуми.
Според истиот извор, Шолц од своја страна ја нагласил важноста на Берлинскиот процес, додавајќи дека е „време Западен Балкан да се приклучи на ЕУ“.
„Неколку пати го споменав прашањето за членството на Западен Балкан во ЕУ. Верувам дека сега е моментот, дека помина долго време и сега мора да следи следниот чекор. Можам да ве уверам дека со моќта што ја имам и со сета поддршка на федералната влада тоа навистина ќе се случи. Мојот впечаток е дека живееме во ново време и тоа има врска и со руската агресија. Во Европа се зголемува вниманието дека треба да се поддржуваме едни со други. Ќе бидам посветен на сè што го поддржува Берлинскиот процес“,
изјави Шолц.
И минатата недела Рама имаше иста изјава – Албанија ќе побара од Европската Унија да го продолжи процесот на пристапување во Унијата одвоено од соседна Северна Македонија, која сè уште се соочува со бугарско вето.
„Албанија веќе не може да чека двата соседи да го решат спорот“,
рече Рама додавајќи дека Албанија има добри односи со двете земји.