Албанскиот премиер во обраќањето на лидерскиот панел на Бледскиот стратешки форум, му се обрати и на бугарскиот претседател Румен Радев, кому му порача да дозволат почеток на преговорите, па потоа да блокираат – како вистински балканци
Престанете да бидете европејци и бидете малку балканци. Дајте да почнеме преговори, па потоа блокирајте. Вака денеска му се обрати премиерот на Албанија Еди Рама на претседателот на Бугарија Румен Радев, на лидерскиот панел на Бледскиот стратегиски форум на темата „Иднината на Европа – Проширувањето“.
„Би сакал да ја искористам приликата и да го замолам претседателот на Бугарија: Ве молам вас, Бугарите, престанете да бидете толку Европјеци и бидете малку Балканци. Отворете ни го патот. Што се обидувате да заштитите? Отворете ни го патот за разговори. Дозволете ни да почнеме преговори со нив (ЕУ) и потоа, вие, како балканци, може да бидете цело време тука и да кажете НЕ- ве блокираме тука, ве блокираме таму, велите не може ова, не може она. Само отворете ни го патот“,
му се обрати Рама на Радев кој седеше до него.
Понатаму, во неговото обраќање, Рама во негов познат стил се пошегува на сметка на Турција, која најдолго чека прием во ЕУ, но и на Северна Македонија и Албанија, кои изминатиов период, исто така, се соочуваат со голем број препреки за почеток на преговорите, со што ја искритикува политиката на ЕУ кон трите земји.
„Некој сретнал еден еврооптимист и еден европесимист. Прво го прашал европтимистот, што мисли за проширувањето, на што тој одговорил: Турција ќе влезе во ЕУ кога со Унијата ќе претседаваат Северна Македонија или Албанија. Потоа го прашал европесимистот, а тој одоговорил: Се разбира дека тие ќе влезат во ЕУ кога Турција ќе претседава со Унијата“,
рече Рама, што предизвика смеа во салата.