Додека Брисел не си ги среди своите прашања во врска со процесот на пристапување, Балканот мора да се фокусира на сопствената иднина, порача албанскиот премиер Еди Рама во изјава за Фанс прес.
„Албанија нема да остане пред вратата на ЕУ и да плаче.“
– изјави Рама.
Албанија се надеваше дека ќе ги започне преговорите за влез во ЕУ во октомври, но не доби “зелено светло“. Според Рама пак, земјата направила повеќе од која било друга за почнување преговори. Сепак, посочува дека безразлика на ставот на Брисел државата ќе продолжи со реформи и ќе ја заврши својата „домашна работа“, затоа што тоа го правела за своите граѓани, а не за Европската Унија.
„Не сме на овој пат затоа што Германија или Франција го бара тоа од нас, туку затоа што тоа е единствениот пат за иднината на нашата земја.“
– порача Рама.
Главните обврски за Тирана кои се под лупата на ЕУ се искоренување на корупцијата и организираниот криминал и зајакнување на владеењето на правото.