„Албанците во Атина станаа гордост на Албанија во овој дел од Европа. Вие сте најголемиот, најсилниот, најубавиот доказ за оваа поврзаност со милиони нераскинливи врски на два народа. Ниту еден ваш проблем не се разликува од кој било проблем на граѓаните на Албанија. Во ниту еден случај албанската држава на етничките Грци не им го ускрати правото на вера, јазик или сопственост. Ним никогаш не им беше ускратено правото на глас поради нивното потекло“, рече албанскиот премиер
Албанскиот премиер Еди Рама вчера се обрати на собир на кој присуствувале етнички Албанци кои живеат во Грција, како и членови и симпатизери на неговата партија во арената „Галачи“ во Атина, при што посочил дека посакува ново поглавје на братство, европски поредок и мир заедно со напредокот на јужниот сосед Грција.
„Горди на Албанците во Грција, горди на Албанија, Атина е првата станица во албанските заедници во Европа“,
напиша Рама на својот фејсбук-профил најавувајќи ја неговата посета на настанот во Атина.
Според грчката влада, посетата на Рама во Атина е приватна и нема официјален карактер.
Грчкиот весник „Катимерини“ објави и овој настан може да предизвика нови тензии во грчко-албанските односи.
Рама изјавил дека Грција е демократска земја, која не можела да спречи лидер да дојде во приватна посета и да им се обрати на своите сонародници.
„Ова привлече повеќе внимание отколку што можеби требаше, но не во вистинско време пред изборите за Европскиот парламент“,
рече Рама пред митингот.
На митингот тој изјавил дека Албанците во Атина станале гордост на Албанија во овој дел од Европа.
„Вие сте најголемиот, најсилниот, најубавиот доказ за оваа поврзаност со милиони нераскинливи врски на два народа. Ниту еден ваш проблем не се разликува од кој било проблем на граѓаните на Албанија. Во ниту еден случај албанската држава на етничките Грци не им го ускрати правото на вера, јазик или сопственост. Ним никогаш не им беше ускратено правото на глас поради нивното потекло“,
изјавил тој.
Тој го цитирал албанскиот поет Наим Фрашери, кој во песна на грчки рече дека првобитната желба на Албанците е да живеат во мир и хармонија со своите соседи.
„Сакаме да живееме во хармонија, ред и мир со сите наши соседи, Словени и Грци. Да не станеме непријатели и да се бориме, доста страдавме“,
рече Рама.
Инаку, со овој митинг во Атина, Рама ја започнал турнејата низ земјите каде што живеат неговите сонародници.
Пред неколку дена на својот профил ја најави посетата на 12 мај, со покана до сите оние што сте во Атина или околу да дојдат, како што напиша, на овој посебен момент на гордост за сите Албанци во Грција.
Рама бил пречекан со овации и аплаузи, а албански знамиња се вееле постојано во текот на митингот. Според албанските медиуми, на митингот присуствувале над 6 илјади луѓе.