Ова е трета влада што ќе ја предводи Рама, а која ја формира откако неговата партија победи на изборите на 25 април годинава. За новиот владин состав треба да се гласа во парламентот наредната недела
Лидерот на албанските социјалисти и актуелен премиер, Еди Рама, на денешната седница на Националното собрание на партијата го соопшти составот на новиот владин кабинет.
Нема некои поголеми изненадувања околу имињата на членовите на новата влада, но она што посебно паѓа во очи е застапеноста на министерки. Од 16 министерски места, во дури 12 ќе седнат жени.
Рама одлучи негова десна рака, заменик премиер, да биде Арбен Ахметај, кој доаѓа на местото на Ерион Браче, кој го објави своето заминување пред неколку дена преку социјалните мрежи.
Старо-нови министри се Олта Џачка за Европа и надворешни работи, Огерта Манастирлиу за здравство, Белинда Балуку за инфраструктура, Нико Пелеши за одбрана, Бледи Чучи за внатрешни работи, Елва Маргарити за култура и Евис Куши за образование.
Нов министер за правда ќе биде Улси Мања, секторот финансии го презема Делинда Ибрахими, за земјоделство министерка ќе биде Фрида Крифца, а за туризам Мирела Кумбаро.
Владата ќе има и четири државни министерки: Елса Спиропали за односи со парламентот, Едона Билали за заштита на претприемачите, Бора Музаќи за млади и деца и Милва Економи за стандарди и услуги.
Ова е трета по ред влада раководена од Рама, откако неговата партија победи на изборете на 25 април годинава.
Според најавите, за неа ќе се гласа на 10 септември, кога е закажана конститутивната седница на новиот законодавен дом.