Нивните реакции следуваат откако бугарското Народно собрание денеска попладне усвои декларација со која, како што се наведува во текстот, се утврдуваат условите под кои Република Бугарија може да ги поддржи следните чекори во процесот на европска интеграција на Република Северна Македонија
Претседателот и премиерот на Албанија, Илир Мета и Еди Рама, ја поздравија одлуката на бугарскиот парламент за „укинувањето на ветото за Република Северна Македонија“.
Во објава на Твитер, премиерот Рама наведува дека повторно имал телефонски разговор со лидерот на бугарската опозиција Бојко Борисов, на кого му се заблагодарил за неговата улога во укинувањето на ветото.
„Само што добив повик од Бојко Борисов. Не можев доволно да му се заблагодарам за доброто мислење дека ми се јави, но можев да му се заблагодарам за неговата одлучувачка улога во отстранувањето на ветото во парламентот! Вистински пријател, вистински лидер. Неговата партија ГЕРБ и другите го спасија образот на Бугарија и ЕУ! Сега ЕУ мора брзо да дејствува“,
напиша Рама на Твитер.
Just got a call from @BoykoBorissov. I couldn't thank him enough for his kind thought to call me,but could thank him for his defining role in getting rid of the VETO in parliament! Real friend,real leader.His party GERB&Others saved the face of Bulgaria&EU!Now EU should act fast!
— Edi Rama (@ediramaal) June 24, 2022
Мета кому денеска му е последен ден на оваа функција, изгласувањето на декларацијата во бугарскиот парламент го нарече долгоочекувана вест од Бугарија и го поздрави тоа преку објава на Фејсбук.
„Конечно дојде долгоочекуваната вест од пријателска Бугарија, која отсекогаш била цврст поддржувач на нашиот процес за членство. Гласањето на бугарскиот парламент за укинувањето на ветото за Северна Македонија го отвори патот за почеток на преговорите за членство на нашите две земји. Се чекаат следните вести од состанокот на Европскиот совет, кој сè уште трае“,
напиша Мета.
Бугарското Народно собрание, со 170 гласа „за“, 37 „против“ и 21 „воздржан“, денеска попладне усвои декларација со која, како што се наведува во текстот, се утврдуваат условите под кои Република Бугарија може да ги поддржи следните чекори во процесот на европска интеграција на Република Северна Македонија. За неа гласаа пратениците на ГЕРБ, Демократска Бугарија, ДПС и Продолжуваме со промените. Одлуката, во суштина, значи прифаќање на францускиот предлог, под одредени услови. Што значи таа прочитајте на линкот во продолжени.