Поднесена е кривична пријава против 58-годишниот Т.Ј. од Радовиш, кој на 5 април бил дијагностициран со ковид-19 и не останал во изолација
Отсекот за економски криминал при Одделението за внатрешни работи Радовиш до Основно јавно обвинителство Радовиш поднесе кривична пријава против радовишанецот Т.Ј. (58), поради постоење основи на сомнение за сторено кривично дело непостапување според здравствени прописи за време на епидемија, соопштија од СВР-Струмица.
На радовишанецот од 17 до 31 март со решение од Државен санитарен и здравствен инспекторат му бил наложен здравствен надзор и домашна изолација поради тоа што во Радовиш остварил контакт со лице од Скопје дијагностицирано како заболено од ковид-19.
„Тој на 4 април околу 10:30 часот отишол на прослава по повод изградба на нова куќа во Радовиш и остварил средба со сопственикот на објектот, а околу 12:00 часот истиот ден се упатил во пункт за достава на брзи пратки во Радовиш, каде што остварил контакт со вработената. Со ова пријавениот ги изложил на ризик лицата со кои ги остварил средбите“,
се истакнува во соопштението на СВР-Струмица.
Т.Ј. бил тестиран за присуство на вирусот во пунктот на Центарот за јавно здравје Штип на 31 март, а на 5 април добил известување дека кај него лабораториски е потврдено присуство на вирусот. До добивањето на резултатите, тој не ги почитувал насоките и препораките на Министерството за здравство и одлуките на Владата, иако му било укажано дека треба да остане во самоизолација до нивно добивање.