Според претседателот Радев, со ова одбивање да се формира влада, опциите во 51. парламент се значително стеснети. Тој вели дека главното прашање не е кога, туку какви ќе бидат изборите
Коалицијата „Продолжуваме со промената – Демократска Бугарија“ (ПП-ДБ) денеска го врати мандатот за состав на влада, и тоа веднаш откога го доби од претседателот на државата, Румен Радев.
Според Надежда Јорданова од ПП-ДБ, одлуката да го вратат мандатот како неисполнет е мотивирана од фактот дека во 51. Народно собрание не постои можност за формирање реформистичко мнозинство кое би го разградило моделот на освоена држава.
„Стотици луѓе на улиците рекоа дека сакаат фер избори, и тоа веднаш. И токму сега ова е централното прашање – да се обезбеди транспарентен, фер и слободен изборен процес. Најдобрите избори беа кога Бугарите гласаа 100 отсто со машина, а ние инсистираме оваа постапка да се врати. Длабоко сме загрижени од обидите на мнозинството, кое си заминува, да ја замени волјата на Бугарите и брзо и во темнина да ги наметне таканаречените уреди за скенирање, кои се подготвуваат во Правниот комитет. Ќе се спротивставиме на овој обид да се замени гласот на граѓаните. И ги повикуваме граѓаните денес во 18 часот да излезат на Плоштадот на независноста и да ја искажат својата волја против овие промени“,
рече Јорданова, пишува БГНЕС.
Според претседателот Радев, со ова одбивање да се формира влада, опциите во 51. парламент се значително стеснети. Тој вели дека главното прашање не е кога, туку какви ќе бидат изборите.
„Очекувам лидерите на политичките партии да не ми кажат кога ќе бидат изборите, туку да се запознаат со одлуката на Уставниот суд од 13 март оваа година, која опишува само дел од скандалите на последните парламентарни избори. Очекувам политичарите да го сторат тоа за да се зголеми довербата на луѓето во изборите и да ги преземат потребните законски измени“,
рече Радев.
Од коалицијата ПП-ДБ уште минатата недела најавија дека нема да прават обиди за формирање влада и дека ќе го вратат мандатот во моментот на добивањето.
Претходно неделава, и Росен Желјазков, како кандидат за премиер од ГЕРБ-СДС, исто така веднаш го врати неисполнет првиот мандат по неговото примање. По враќањето на мандатот, Желјазков посочи дека најсоодветниот датум за избори е 29 март.
Во согласност со Уставот, претседателот Радев сега треба да го додели третиот и последен мандат на некоја од другите парламентарни групи за да посочи кандидат за премиер.
Според бугарскиот Устав, доколку првиот мандатар не предложи состав на министерски совет во рок од седум дена, претседателот го доверува мандатот на втората по големина група, а доколку и тоа не успее, тогаш на трета партија по негов избор. Доколку не се постигне согласност, се назначува преодна влада и се закажуваат нови избори во рок од два месеца.
Речиси сите партии во парламентот, вклучувајќи ги „Продолжуваме со промената – Демократска Бугарија“, „Преродба“, „ДПС – Нов почеток“, БСП и другите помали формации, веќе се изјаснија дека нови избори се единственото решение. Некои од партиите дури го нарекоа сегашниот состав на Собранието „апсолутно нелегитимен“. Ова ќе бидат осми по ред парламентарни избори во Бугарија од 2021 година наваму.