Учесниците на протестот пред Собранието побараа од пратениците да донесат измени на Законот за минимална плата, со цел таа да се зголеми на 500 евра
Да им го свртиме грбот за да почувстуваат како е кога работникот го врти грбот. Ова денеска пред Сообранието го побара претседателот на Сојузот на синдикатите на Македонија (ССМ), Слободан Трендафилов, од учесниците на протестот по повод 1 Мај, што во 11 часот почна пред Работничкиот дом во Скопје, со маршрута на движење преку Собранието и Стопанската комора до Владата.
Учесниците на протестот пред Собранието побараа од пратениците да донесат измени на Законот за минимална плата, со цел таа да се зголеми на 500 евра.
„Денеска на оваа страна од барикадите сме ние, кои бараме достоинствена плата за достоинствена работа, а од другата страна се тие кои уживаат привилегии. Луксузот ваш е трудот наш“,
рече тој.
Потоа, побара од насобраните да го свртат грбот кон Собранието за, како што рече, да почувствуваат како е кога работникот го врти грбот.
„Ве молам, макар и симболично, да им го завртите грбот, како што им го вртам јас, за да почувствуваат како е кога работник ќе ви заврти грб. Им ветивме дека ќе дојдеме повеќе, ќе дојдеме и многу повеќе, доколку не донесат измени на Законот за минимална плата и не ги зголемат сите останати плати. Доколку не – ние на минималец, тие на минималец“,
кажа Трендафилов пред Собранието.
Според него, жално е што на 1 Мај, кога се одбележува работчничката борба за осумчасовно работно време, „дел од овие зад нас донесоа закон со кој се овозможува во Македонија да имаме 12-часовен работен ден, нешто што го снемало во светот во 1886 година“.
На 1 Мај, како што најавија од ССМ, бараат минималната плата да биде 500 евра, а сите други плати да се зголемат за 100 евра, како и да се почитуваат колективните договори и работничките права.
Од Собранието, протестниот марш продолжи кон Стопанската комора и пред Владата.
Конфедерацијата на слободни синдикати (КСС) не учествува на протестот во организација на ССМ.
Нејзиниот претседател Благоја Ралповски вчера рече дека во државата има добар социјален дијалог, како и оти проблемите се решаваат на маса.