Николовска нагласи дека работната група ќе расправа само за заклучоците на Владата, а пропо меѓународниот документ што Македонија го има потпишано и ја отфрли можноста работната група да расправа за други интервенции во Уставот, пред сè оние што се однесуваат на јазиците на другите етнички групи и на формулацијата „20 проценти“, односно таа да се замени со „албански јазик“, што е барање на дел од албанските политички партии
Работната група за подготвување на предлог-иницијативата за потребата од уставни измени со кои Бугарите и другите народи треба да бидат вметнати во највисокиот правен акт на државата, на денешната седница во Владата едногласно го усвои Деловникот за работа, информира претседателката Маргарита Цаца-Николовска.
„Деловникот е едногласно усвоен и отсега натаму веќе сите формално-правни околности, проблеми, елементи, нема да бидат проблем со оглед на јасноста и прецизноста. Утре или задутре Деловникот ќе биде објавен на станицата на Министерството за правда и јавноста ќе може да го оцени. Јас го оценувам како добар, го оценувам како основа која дава можност за се она што треба ние понатаму да работиме без да влегуваме во некои дискусии кои што ќе ја одолговлекуваат работата, а немаме многу време. Ние рокови некои немаме зацртано, меѓутоа она што е важно треба да се имаат предвид апсолутно сите оние можности што треба да ги искористиме за меѓународната заедница да продолжи да работи согласно нејзината агенда во која што ние влегуваме“,
изјави Николовска.
Николовска нагласи дека работната група ќе расправа само за заклучоците на Владата, а пропо меѓународниот документ кој Македонија го има потпишано, а кој провејува преку рамковниот состав, преку заклучоците на Собрание, преку одлуката на Влада и преку решенијата кои што министерот за правда ги има изготвено за секој од членовите на работната група. Таа ја отфрли можноста работната група да расправа за други интервенции во Уставот, пред се оние кои се однесуваат на јазиците на другите етнички групи и на формулацијата „20 проценти“, односно таа да се замени со „албански јазик“, што е барање на дел од албанските политички партии.
„Приоритет е ова да се стигне со време за да може колку е можно побрзо државата да ги презентира резултатите коишто ги има преземено од меѓународниот договор. Сега за сега нема да се отвораат други прашања за Уставот. Ова е нешто кое првенствено треба да се заврши да се издрафтира тој нацрт-документ, да се достави до предлагачот којшто понатаму ќе го достави Собрание и веќе политичкиот сегмент е тука во прашање“,
изјави претседателката на работната група.
Таа рече дека групата ќе се состанува еднаш неделно, а одлуките ќе се носат со мнозинство од вкупниот број членови.
Работната група за подготовка на предлог иницијативата за потребата од уставни измени, за внесување на Бугарите, заедно со други етнички заедници, што е услов за отворање на кластерите во процесот на преговори со Европската Унија, ја сочинуваат 23 членови од кои десет се од редот на експертите, десет се предлози на политички партии и тројца се членови од институции.
Експерти во работната група се:
- Сали Мурати – поранешен претседател на Уставен суд
- Маргарита Цаца Николовска – поранешен судија во Европскиот суд за човекови права во Стразбур
- Бајрам Положани – поранешен уставен судија и професор по уставно право
- Бранко Наумовски – поранешен претседател на Уставен суд
- Јетон Шасивари – професор на Универзитетот на ЈИЕ
- Ана Чупеска – професор на Правен факултет ,,Јустинијан Први”
- Елена Михајлова Стратилати – професор на Правен факултет „Јустинијан Први“
- Беса Арифи – професор на Универзитетот на ЈИЕ
- Јагода Митревска – професор на Меѓународен Славјански Универзитет
- Марија Пандевска – професор на Институт за национална историја
Членови на работната група предложени од партиите се:
- Цветанка Иванова – СДСМ
- Арбер Адеми – ДУИ
- Ремзи Мехмеди – Алијанса на Албанците
- Соња Мираковска – НСДП
- Нано Ружин – ЛДП
- Христа Најданов – ДОМ
- Темелко Ристески – Партија на пензионери
- Раметула Куќи – ДПА
- Еран Куртиш – Партија за движење на Турците
- Бејџан Илјас – Демократска партија на Турците
Членови на работната група предложени од институции се:
- Александар Спасов – Кабинет на претседател на Република Северна Македонија
- Драган Тилев – Секретаријат за европски прашања
- Шпенд Садики – Министерство за надворешни работи