За Путин и кинескиот претседател Си Ѓинпинг, овој „мултиполарен“ свет е алтернатива на американската хегемонија во светот, што и двајцата лидери ја осудуваат
Шангајската организација за соработка (ШОС) денеска, на самитот во Астана, Казахстан, ќе повика на праведен мултиполарен светски поредок, рече рускиот претседател Владимир Путин, користејќи фраза насочена кон хегемонијата на САД, што тој цврсто ја осудува.
Вчера во главниот град на Казахстан, Астана, беше отворен дводневниот самит на Шангајската организација за соработка (ШОС), форум основан во 2001 година од Кина и Русија како чувар на безбедноста во Eвроазискиот Rегион.
Заедно со Русија и Кина, овој блок го сочинуваат поранешните советски републики во Централна Азија, како и Индија и Иран.
„Во последната изјава, земјите членки ќе ја истакнат својата посветеност за создавање фер, мултиполарен светски поредок заснован на клучната улога на Обединетите нации, меѓународното право и аспирациите на суверените држави кон заемно корисно партнерство“,
рече Путин на отворање на пленарната седница.
За Путин и кинескиот претседател Си Ѓинпинг, овој „мултиполарен“ свет е алтернатива на американската хегемонија во светот, што и двајцата лидери ја осудуваат. По почетокот на руската инвазија на Украина, Путин во голема мера ги зголеми напорите да ги обедини земјите од Азија, Африка, Блискиот Исток и Латинска Америка околу оваа идеја.
Досега ШОС имаше девет членки, Кина, Индија, Иран, Русија, Казахстан, Киргистан, Узбекистан, Пакистан и Таџикистан. Во четвртокот, Белорусија се приклучи на ШОС како десетта членка.
На минатогодишниот виртуелен самит, групата објави изјава во која го критикуваше, како што рече, негативното влијание на „едностраното и неограничено проширување на глобалните системи за противракетна одбрана од страна на одредени земји или групи земји“, без директно да го спомне проширувањето на НАТО или западната воена помош за Украина.