Според него, САД можат да си дозволат да го купат Гренланд, доколку „тој се продаваше по цени споредливи со оние по кои Русија им ја продаде Алјаска на Американците во 19 век“. Рускиот претседател рече дека според неговите пресметки, сумата за купување на Гренланд би можела да изнесува помеѓу 200 милиони и 1 милијарда долари
Претседателот на Русија, Владимир Путин, изјави дека ситуацијата околу Гренланд не ја засега неговата земја.
„Тоа што се случува со Гренланд воопшто не нè засега“,
рече Путин за време на оперативното советување со постојаните членки на Советот за безбедност на Русија.
Според рускиот претседател, САД и Данска ќе најдат заедничко решение.
„Мислам дека тие ќе се договорат меѓу себе. Патем, Данска секогаш се однесувала кон Гренланд како кон колонија, доста строго, ако не и сурово. Но, тоа веќе е сосема друго прашање, тешко дека сега некого го интересира тоа“,
истакна тој.
Според него, САД можат да си дозволат да го купат Гренланд, доколку „тој се продаваше по цени споредливи со оние по кои Русија им ја продаде Алјаска на Американците во 19 век“. Рускиот претседател рече дека според неговите пресметки, сумата за купување на Гренланд би можела да изнесува помеѓу 200 милиони и 1 милијарда долари.
„Површината на Гренланд е малку поголема (од површината на Алјаска), според мене е еднаква на 2,166 милиони квадратни километри… Односно, разликата е приближно 450-449 илјади квадратни километри. Е па, ако го споредиме тоа со вредноста на стекнувањето на Алјаска од страна на САД, тогаш цената за Гренланд би била некаде околу 200-250 милиони долари. Ако ги земеме предвид тогашните цени на златото, таа бројка би била поголема, веројатно околу милијарда. Но, мислам дека САД ќе можат да си ја дозволат и таа сума“,
рече рускиот лидер.
Путин го коментираше и мировниот процес во Појасот Газа.
„Најважно е целиот процес позитивно да се одрази врз долгорочното решавање на палестинско-израелскиот конфликт врз основа на соодветните одлуки на ОН. Неопходно е да бидат земени предвид неотуѓивите потреби и желби на Палестинците“,
нагласи рускиот претседател.