Руската делегација ќе ја предводи помошникот на претседателот, Владимир Медински, а во неа ќе бидат и заменик-министерот за надворешни работи Михаил Галужин и заменик-министерот за одбрана Александар Фомин
Рускиот претседател Владимир Путин не е меѓу имињата наведени од Кремљ кои ќе присуствуваат на мировните преговори за војната во Украина, во Истанбул, што треба да се одржат утре, и покрај повиците од украинскиот претседател Володимир Зеленски тој да присуствува, пишува Би-би-си.
Според соопштението на Кремљ, руската делегација наместо тоа ќе ја предводи помошникот на претседателот, Владимир Медински, а во неа ќе бидат и заменик-министерот за надворешни работи Михаил Галужин и заменик-министерот за одбрана Александар Фомин.
Зеленски претходно изјави дека ќе присуствува на разговорите и ќе се сретне лично со Путин доколку рускиот претседател се согласи, и рече дека ќе направи сè што може за да се осигури дека средбата лице в лице ќе се одржи.
Украинскиот претседател ќе биде во турската престолнина Анкара во четврток за да се сретне со претседателот Реџеп Таип Ердоган.
Путин и Зеленски не се сретнале лично од декември 2019 година. Русија и Украина последен пат одржаа директни преговори во март 2022 година во Истанбул, кратко откако Москва ја започна својата целосна инвазија на својот сосед.
Путин првично повика на директни разговори меѓу Русија и Украина, пред Зеленски да објави дека ќе оди лично и очекува рускиот претседател да патува и тој.
Предлогот на Путин за директни разговори во Истанбул следеше по повикот на западните сили за 30-дневен прекин на огнот, откако европските лидери се состанаа во Киев во саботата.
Откако Трамп ја повика Украина да ја прифати понудата во неделата, Зеленски рече дека самиот ќе отпатува таму.
„Нема смисла да се продолжуваат убиствата. И јас ќе го чекам Путин во Турција в четврток. Лично“,
напиша Зеленски во објава на социјалните мрежи.
Денеска американскиот претседател Доналд Трамп ја спомена можноста самиот да се придружи на состанокот доколку дојде и Путин.
Американскиот претседател, кој моментално е во Катар, им рече на новинарите дека не знае дали неговиот руски колега ќе присуствува „ако не сум таму“.
„Знам дека би сакал да бидам таму и тоа е можност. Ако можеме да ја завршиме војната, би размислувал за тоа“,
рече Трамп.