На маргините на Самитот на Шангајската организација за соработка во Узбекистан, премиерот на Индија, Нарендра Моди му порача на Путин дека сега не е време за војна, на што Путин одговори дека сака „сето ова да заврши што е можно поскоро“
Претседателот на Руската Федерација Владимир Путин денеска се сретна со премиерот на Индија, Нарендра Моди кој му посочи на рускиот лидер оти сега не е време за војна и дека безбедноста со храната, ѓубривата и горивото се меѓу главните проблеми во светот поради војната во Украина.
На маргините на Самитот на Шангајската организација за соработка во Узбекистан, Моди му порача на Путин дека демократијата, дипломатијата и дијалогот го одржуваат светот заедно.
Рускиот претседател, пак, рече дека сака војната да заврши што е можно поскоро.
„Ја знам вашата позиција за конфликтот во Украина и ја знам вашата загриженост. Сакаме сето ова да заврши што е можно поскоро“,
кажа Путин.
Путин додаде дека, за жал, спротивната страна, односно лидерите во Украина отфрлиле каков било преговарачки процес.
Ова е прва директна средба меѓу двајцата лидери од почетокот на руската инвазија на Украина.
Индија избегна експлицитно да ја осуди Русија за нејзината инвазија на Украина, која допринесе до зголемување на цените на нафтата и другите стоки.