Украина вели дека не сака да ѝ даде на Русија територија што Москва не успеа да ја освои на бојното поле, а украинскиот претседател Володимир Зеленски изјави дека Москва не треба да биде наградена за војна што ја започнала
Рускиот претседател Владимир Путин, во интервју објавено денеска, изјави дека Русија ќе преземе целосна контрола врз украинскиот регион Донбас со сила доколку украинските сили не се повлечат, што Киев категорично го отфрли.
Путин испрати десетици илјади војници во Украина во февруари 2022 година по осум години конфликт меѓу проруските сепаратисти и украинските сили во Донбас, кој ги опфаќа регионите Донецк и Луганск.
„Или ќе ги ослободиме овие територии со сила на оружје или украинските сили ќе ги напуштат овие територии“,
изјави Путин за неделникот „Индија денес“ пред неговата посета на Њу Делхи, пренесе руската државна телевизија.
Украина вели дека не сака да ѝ даде на Русија територија што Москва не успеа да ја освои на бојното поле, а украинскиот претседател Володимир Зеленски изјави дека Москва не треба да биде наградена за војна што ја започнала.
Русија моментално контролира околу 19,2 проценти од Украина, вклучувајќи го и Кримскиот полуостров што го анектираше во 2014 година, Луганската област, 80 проценти од Донецк, околу 75 проценти од Херсонската и Запорошката област и помали делови од Харковската, Сумската, Николаевската и Дњепропетровската област.
Околу 5 000 квадратни километри од Донецк остануваат под украинска контрола. Во разговорите со Соединетите Американски Држави за можен нацрт-мировен договор за завршување на војната, Русија постојано повторува дека сака контрола врз целиот Донбас и дека Соединетите Американски Држави треба неофицијално да ја признаат контролата на Москва.
Москва ги прогласи регионите Луганск, Донецк, Херсон и Запорожје за нови делови од Руската Федерација во 2022 година по референдумите што Западот и Киев ги отфрлаат како лажни. Повеќето земји ги сметаат регионите и Крим за украинска територија.
Путин ги прими американските претставници Стив Виткоф и Џаред Кушнер во Кремљ претходно оваа недела и рече дека Русија прифатила некои американски предлози за Украина и дека разговорите треба да продолжат.
Руската државна новинска агенција РИА го цитираше Путин како вели дека неговата средба со Виткоф и Кушнер била многу корисна и се темелела на предлозите што тој и американскиот претседател Доналд Трамп ги дискутирале во Алјаска во август.