На новинарско прашање да даде коментар за постапките на украинскиот лидер, Трамп рече дека „кога започнуваш војна, треба да знаеш дека можеш да победиш“
Американскиот претседател Доналд Трамп смета дека во војната во Украина милиони луѓе се мртви поради три лица – рускиот претседател Владимир Путин, поранешниот американски претседател Џозеф Бајден и украинскиот претседател Володимир Зеленски, пренесуваат американските медиуми.
Трамп на новинарите во Овалната соба на Белата куќа, по средбата со лидерот на Ел Салвадор, Најиб Букеле, им кажа дека сè што сака е да „запрат убиствата“ во Украина, пренесува Скај њуз.
„Бајден можеше ова да го спречи, Зеленски можеше да го запре, а Путин никогаш не требаше да го започне. И сè што можам да направам е да се обидам да го запрам. Тоа е сè што сакам. Сакам да го запреме убиството, мислам дека правиме добра работа во тој поглед. Наскоро ќе имаме многу добри предлози“,
рече тој.
На новинарско прашање да даде коментар за постапките на украинскиот лидер, Трамп рече дека „кога започнуваш војна, треба да знаеш дека можеш да победиш“.
„Не започнувате војна против некој што е 20 пати поголем од вас. А, потоа се надевате дека ќе ви дадат неколку проектили“,
вели американскиот претседател.
NOW – Trump to Zelensky: "You don't start a war against somebody that is 20 times your size and then hope that people give you some missiles." pic.twitter.com/NOfYIUaknG
— Disclose.tv (@disclosetv) April 14, 2025
Смета дека немаше да се случи таа страшна војна доколку претседателските избори во САД во 2020 година, како што тврди, не беа „наместени“.
„Претседателот Зеленски и корумпираниот Џо Бајден направија апсолутно ужасна работа што дозволија да започне оваа трагедија. Имаше толку многу начини да се спречи. Но, тоа е во минатото. Сега мораме да ја запреме војната и да постиме. Тоа е толку тажно“,
кажа тој.
Претходно, Трамп изјави дека „војната меѓу Русија и Украина е војна на Бајден“, а не негова.
Американскиот претседател се залага за договор за ставање крај на војната и одржува блиски врски со Кремљ преку неговиот специјален пратеник Стив Виткоф.