Прво Антикорупциска да даде мислење дали кај кандидатурите за членови на советите на АВМУ и МРТВ има судир на интереси, па дури потоа ќе следи избор на членовите – заклучи на денешната расправа собраниската комисија за избори и именувања.
Претседателот на Комисијата, Илија Димовски од ВМРО-ДПМНЕ, посочи дека кај дел од кандидатите, без да ги именува, можно е да постои судир на интереси, но се согласи со останатите пратеници дека во оваа фаза Комисијата не може да решава дали навистина постои судир на интереси. Поради тоа, пратениците решија списокот со имиња на кандидатите и нивните кандидатури да ги испратат до Антикорупциска, која ќе треба да даде свое мислење.
Мислењето на антикорупционерите нема да биде пресудно, но од Комисијата посочија дека ќе игра голема улога во филтрирањето на имињата на кандиндатите за наредните фази.
Првата следна фаза ќе биде јавната расправа, која ќе биде закажана веднаш откако Антикорупциска ќе ги испрати мислењата до законодавниот дом. На јавната расправа збор ќе земат и самите кандидати.
За членови на советот на АВМУ конкурираат 28 кандидати, а бројот на места кои треба да бидат пополнети е 7.
Од друга страна пак, за 11 членови на програмскиот совет на МРТВ пријавени биле 19 кандидати, од кои една кандидатура е отфрлена како некомплетна.
Јавната расправа ќе биде одржана веднаш по одморите на пратениците, до кога се очекува Антикорупциска да ги достави мислењата.