На почетокот на следната недела Владата ќе најави нови мерки на олеснување на рестрикциите, а кои ќе се однесуваат на работата на угостителските објекти, најави министерот за здравство Венко Филипче.
Сепак, тоа ќе се однесува пред се’ на она што го предвидуваат протоколите кои ги изработија експертите – епидемиолози, а првите угостителски објекти ќе можат да почнат со работа кон крајот на следната недела.
„На почетокот на неделата сакаме да укажеме кои се принципите што треба да се почитуваат, за во мометот кога тие ќе почнат со работа, да знаат како да се вратат во функција“,
рече Филипче во интервју за Сител.
Повторното отворање на угостителските објекти беше најавено во втората тн. транзициска фаза од олеснување на мерките, но под строги мерки и протоколи кои нема да го доведат во ризик здравјето на граѓаните. Притоа се споменуваше дека најпрво е можно тоа да биде преку шалтерски систем, потоа преку отворање на терасите, на масите кои б биле на задолжителни растојание од 2 метри да може да има по најмногу 4 гости, и сите и гостите и вработените да носат задолжителна лична заштита.
Агенцијата за храна и ветеринарство исто така објави кои услови треба да бидат преземени пред угоститетелските објекти да се вратат во функција по 19 мај.
Од почетокот на неделава голем број кафулиња и ресторани започнаа со реновирања, чистеа и дезинфекции, што се толкува како своевидна најава дека наскоро ќе бидат отворени.