„Секој кој се обидува да прикаже дека се врши наводна присилна вакцинација ја манипулира јавноста. Никој не е присилен на ништо. Обврска на државата е да го штити јавното здравје и да носи мерки“, коментира министерот Филипче
Под мотото „Стоп за присилната вакцинација“ вечерва во Скопје, но и во неколку други градови во државата, се одржаа протест на кои беше изразено незадоволство од рестриктивните мерки што треба да стапат на сила од утре, а со кои во локали ќе можат да влегуваат само вакцинирани и оние кои прележале ковид-19 во период од 45 дена по оздравувањето.
Присутните на протестот изразија револт затоа што сметаат дека со новите мерки им се ускратува слободата, се кршат човекови права и се дискриминираат граѓани кои не сакаат да се вакцинираат.
Протестот почна пред Собранието, а продолжи пред Владата.
Министерот за здравство, Венко Филипче, на Фејсбук објави коментар по вечерашниот протест, оценувајќи дека протестот е уставно загарантирано право, но исто такво е и правото на здравје. Мерките што ги предлагаме се веќе докажано ефикасни, а вакцинацијата е единствен начин да се бориме против вирусот, напиша Филипче.
Тој наведува дека на многу места во Европа веќе е секојдневие да се бара сертификат за влез на масовни настани и во угостителски објекти и дека тоа никој не го смета за дискриминација, туку за одговорност и заштита на јавното здравје. Тој наведе дека вакцината останува доброволна.
„Секој кој се обидува да прикаже дека се врши наводна присилна вакцинација ја манипулира јавноста. Никој не е присилен на ништо. Обврска на државата е да го штити јавното здравје и да носи мерки“,
напиша Филипче.