Студентот Ѓорѓе Петровиќ од Филозофскиот факултет рече дека целите се уште се исти, оти барањата не се менуваат и дека сакаат правдата да биде задоволена и луѓето кои се виновни да одговараат
Вечерва во Ниш и во други градови во Србија се одржаа протести за поддршка на деканката на Филозофскиот факултет во Ниш Наталија Јовановиќ која денеска беше нападната со нож и повредена.
Студентите во блокада, кои го најавија собирот за поддршка, велат дека ова е втор напад врз деканката Наталија Јовановиќ, но и уште еден во низата напади врз оние кои сакаат на фер начин да дојдат до вистината, пренесува српскиот портал „Јужни вести“.
Студентот Ѓорѓе Петровиќ од Филозофскиот факултет рече дека целите се уште се исти, оти барањата не се менуваат и дека сакаат правдата да биде задоволена и луѓето кои се виновни да одговараат.
„Ве повикувам на солидарност и разбирање, бидејќи ова не е прв пат и не можеме да гарантираме дека ќе биде последен. Затоа мораме да излеземе на улица, да им покажеме дека сме посилни од нив и дека само заедно можеме да истраеме во оваа борба и да ги победиме. Останете надвор на улица додека не се исполнат вашите барања“,
рече Петровиќ.
„ПроГлас“ и Сојузот на слободни организации на Србија (СОС), како што пишува „Н1“, го осудуваат денешниот напад врз деканката Јовановиќ и оценуваат дека „овој застрашувачки настан е само кулминација на повеќемесечните напади на властодршците врз сите сегменти на бунтовното општество кои се борат за укинување на партократската држава, нееднаквоста пред законот и воспоставување владеење на правото и поправедно општество“.
Освен во Ниш, „Н1“ пишува дека протести се одржале и во Борча, Обреновац, Ваљево.
Осуда за денешниот напад на деканката на Филозофскиот факултет во Ниш има и од нејзините колеги од Универзитетот во Нови Сад.
„Најостро го осудуваме нападот на деканот на Филозофскиот факултет на Универзитетот во Ниш, проф. д-р Наталија Јовановиќ. Бараме најодговорните претставници на властите решително да се спротивстават на создавањето одмаздничка ситуација во општеството“,
се наведува во соопштението.
Од Филозофскиот факултет на Универзитетот во Белград преку соопштение го осудуваат нападот на Јовановиќ и наведуваат дека овој напад „не е изолиран инцидент, туку алармантен резултат на долгорочна кампања насочена кон универзитетски професори, истражувачи и интелектуалци кои одбиваат да им служат на политичките интереси“.
На снимката која утринава ја објави „Н1“ се гледа како група граѓани го одземаат ножот од напаѓачот, додека, пак, други граѓани ја преврзуваат раката на деканката. Очевидци за „Н1“ изјавиле дека на нападот ѝ претходел вербален напад од истата жена, која рекла дека ќе ѝ фрли киселина на Јовановиќ.
Набрзо по ранувањето, деканката со возило на Итната помош е пренесена во Ургентниот центар во Ниш од каде попладнево е пуштена откако ја добила сета потребна медицинска нега.