Од говорницата беше порачано дека „мрачната есен треба да биде наша пролет“, повикувајќи на борба за децата и старите лица
Граѓани на Тузла денеска се собраа пред зградата на Полициската управа на Министерството за внатрешни работи на Тузланскиот кантон, изразувајќи го своето незадоволство и барајќи итна одговорност од институциите за „системски неуспеси“ што доведоа до неколку големи трагедии.
Повод за масовниот собир се неодамнешните апсења под сомнение за трговија со луѓе и сексуална експлоатација на малолетници, како и големата трагедија во пензионерскиот дом, во која животот го загубија 13 лица.
Граѓаните истакнаа дека овие случаи разоткриваат негрижа кон најранливите членови на општеството и дека е време да се прекине молкот за недостатоците во работата на институциите.
Порака до властите испрати студентката од Тузла, Ена Бегановиќ, која нагласи дека системот ги изневерил граѓаните.
„Не е ниту прв ниту последен пат системот да пропадне. Имам прашање до оние на власт: дали ви е срам, дали ви е непријатно што системот толку многу пропаѓа под вашите прсти? Вие сте тие што ја прават оваа земја, кантон и град. Најранливите во нашето општество страдаат – од пензионери до деца. Државата пропадна, системот се сруши, од нас зависи колку сме спремни да се разбудиме и да се бориме“,
изјави Бегановиќ.
Од говорницата беше порачано дека „мрачната есен треба да биде наша пролет“, повикувајќи на борба за децата и старите лица.
На протестот се приклучи и Муриз Мемиќ, таткото на убиениот Џенан Мемиќ, кој дојде од Сараево за да им даде поддршка на граѓаните на Тузла.
„Од една трагедија во друга… Мора да издржиме бидејќи владата нема сама да си оди. Мора да бидеме упорни. Долго време не сме безбедни. Не сме безбедни 30 години, но живееме, преживуваме… Но, тука ништо не е добро“,
рече Мемиќ.
Протестот беше мирен, со присуство на граѓани од сите генерации кои бараат промена и одговорност.