Дел од членовите на ЛГБТИ заедницата кои присуствуваа на протестот го обвинија премиерот Виктор Орбан за стигматизирање на заедницата
Унгарските граѓански организации за човекови права денеска во Будимпешта протестираа поради стапувањето на сила на законот кој дополнително ќе ја маргинализира ЛГБТИ-заедницата, а Европската унија се произнесе дека законот е штетен и против човековите права.
Активистите, денеска, пред парламентот во Будимпешта поставија десетметарско срце во боите на виножитото кои се заштитен знак на ЛГБТИ заедницата. Законот, кој денеска стапи на сила забранува промовирање на хомосексалноста.
Директорот на „Амнести интернешнел“ во Унгарија, Дејвид Виг, вели дека ваквата политика на унгарската влада е лоша и дека законот е хомофобичен.
„Не е во ред да се менуваат образованите програми, ниту кампањите поради хоммофобичниот и трансфобичниот закон“,
додаде Виг.
Дел од членовите на ЛГБТИ заедницата кои присуствуваа на протестот го обвинија премиерот Виктор Орбан за стигматизирање на заедницата.
Орбан пак од својата страна тврди дека целта на законот е да се заштитат правата на децата и предупреди дека Брисел не треба да се меша во образовниот систем на Унгарија.
„Европскиот парламент и Комисијата сакаат ЛГБТИ и активистите да бидат застапени во училиштата, но ние не сакаме“,
вели Орбан.
Претседателката на Европската комисија, Урсула фон дер Лајен, вчера се закани дека ќе поведе прекршочна постапка против Унгарија поради законот за ЛГБТИ заедницата. Од Унгарија се бара да го повлече законот оценет како дискриминаторски за ЛГБТИ заедницата.
„Доколку Унгарија не ја исправи ваквата состојба, ЕК ќе ги искористи сите надлежности што и се дадени како чувар на договорот“,
рече Урсула фон дер Лајен.
Претседателката на ЕК повторно законот го нарече „срамен“, бидејќи со него се забранува ширење информации за хомосексуалноста на малолетници.
Комисијата може да отвори постапка за кршење на европското право, што може да доведе до интервенција на Судот на правдата на ЕУ и финансиски санкции против Унгарија.
Според дипломатски извори, таквата постапка може да биде покрената најдоцна до средината на јули.
Комисијата на крајот на јуни испрати писмо до унгарските власти во кое изразува „правна загриженост“ во врска со текстот на законот усвоен на 15 јуни.
„Да бидеме јасни, ние ги користиме своите овластувања без оглед на земјата-членка што го крши европското право. Од почетокот на мојот мандат, ние почнавме околу 40 прекршочни постапки поврзани со заштитата на владеењето на правото и другите европски вредности“,
рече претседателката на ЕК.