Сега, според партија, следува јасен патоказ напред за СДСМ, односно потребни се промени на политичко и кадровско ниво кои ќе донесат раст и зајакнување
Пропаднаа обидите и сценаријата да го снема Социјалдемократскиот сојуз (СДСМ). Отсега натаму партијата ќе се враќа само посилна. Ова е денешното соопштение од опозициската партија, во кое, коментирајќи ги резултатите од локалните избори, посочија дека ВМРО-ДПМНЕ за нешто повеќе од една година изгуби 140 000 гласа, тренд кој, велат, ќе продолжи и во иднина.
„Пирова им е победата, затоа што граѓаните јасно ги препознаа нивните погрешни политики на секое поле. Цветаат клиентелизмот, партизацијата, неспособноста и ароганцијата. За една година од мандатот ВМРО-ДПМНЕ нема ниту една политика со која може да се пофали, и тоа граѓаните го гледаат. Државата е на колена – економски, финансиски и социјално и, за жал, овој тренд ќе продолжи. Освен партиски прес-конференции со напади врз СДСМ, не можат да испорачаат ништо друго“,
велат од партијата.
ВМРО-ДПМНЕ, како што додаваат, никогаш веќе нема да може да се надева на поддршката со која дојде на власт, оти таа ќе продолжи да паѓа.
„СДСМ останува најсилната опозициска партија, и покрај сите обиди на ВМРО-ДПМНЕ и нивните сателити, ЗНАМ, да го негираат тоа“,
пишува во партиското соопштение.
Сега, според партијата, следува јасен патоказ напред за СДСМ, односно потребни се промени на политичко и кадровско ниво кои ќе донесат раст и зајакнување.
Коалицијата предводена од ВМРО-ДПМНЕ во вториот круг освои градоначалнички места во Град Скопје и во 21 општина, коалицијата ВЛЕН во четири, коалицијата предводена од Социјалдемократскиот сојуз (СДСМ) во три, Унијата на Роми, Движењето ЗНАМ и „Националната алијанса за интеграција“ (НАИ) во по една општина, а во една општина ќе раководи независен кандидат за градоначалник.