Човекот исчезна во водите на вештачкото езеро Глажња пред пет дена, на 30 јули. Оттогаш нуркачки тимови на специјалните единици секојдневно беа во потрага
Спасувачките тимови денеска во вештачкото езеро Глажња во Општина Липково го пронајдоа безживотното тело на 29-годишниот локален жител по кого се трагаше неколку дена.
Директорите на Центарот за управување со кризи (ЦУК) и на Дирекцијата за заштита и спасување (ДЗС), Стојанче Ангелов и Беким Максути, денеска беа на терен кај вештачкото езеро.
„По петдневна потрага храбрите нуркачи на армиските специјалци ‘Волци’ и полициските специјалци ‘Тигри’ успеаја да го пронајдат телото на несреќното 29-годишно момче кое пред шест дена исчезна во водите на вештачкото езеро Глажња“,
изјави Стојанче Агелов, директор на Центарот за управување со кризи.
Во потрагата по момчето кое минатата недела исчезна во водите на езерото беа вклучени шест нуркачи од „Тигрите“, осум нуркачи од „Волците“, како и тимови и нуркачи од ДЗС. При потрагата на брегот асистираа и полициски службеници од СВР Куманово.
„За жал условите и денеска се лоши, видливоста е многу слаба. На само неколку метри од брегот, длабочината достигнува до повеќе од 10 метри, за на неколку метри понатаму да има длабочина поголема од 20 метри. Нашите нуркачи се обучени и нуркаат до максимум 40 метри длабочина“,
изјави претходно денеска Ангелов.
Инаку, човекот исчезна во водите на вештачкото езеро на браната „Глажња“ пред пет дена, на 30 јули. И покрај лошите услови и слабата видливост, нуркачки тимови од специјалните единици, како и припадниците на ДЗС секојневно продолжуваа со потрагата по исчезнатиот човек. Првичната информација беше дека се работи за маж со иницијали Ф. Р. од село Никуштак, на возраст од 30 години.