Двете жени биле пронајдени од полицијата на црн пат помеѓу селата Долно Количани и Батинци и според надлежните се во добра здравствена состојба
Двете женски лица, за кои Центарот за управување со кризи (ЦУК) попладнево соопшти дека се изгубиле во реонот на патот кон Дрисла, се пронајдени, информираа од оваа институција.
Иако првичната информација беше дека станува збор за странски државјанки, од ЦУК појаснуваат дека сепак се работи за лица со македонско државјанство, а грешката настанала при првичната комуникација.
Двете жени биле пронајдени од полицијата на црн пат помеѓу селата Долно Количани и Батинци и според надлежните се во добра здравствена состојба.
„Добиена е повратна информација од Полициската станица ‘Драчево’ дека двете женски лица се пронајдени на црн пат помеѓу Долно Количани и Батинци. Лицата се во добра здравствена состојба и со возило, во придружба на полицијата, веќе се движат кон Драчево. Појаснуваме дека, поради грешка во првичната комуникација, не станува збор за странски државјанки, туку за државјанки на РС Македонија“,
се вели во информацијата од ЦУК.
Како што соопштија претходно од Центарот, случајот бил пријавен преку единствениот повикувачки број за итни случаи – 112, по што било побарано од Министерството за внатрешни работи (МВР) и Полициската станица Драчево да упатат екипа на терен.
Двете жени се изгубиле додека патувале со возило во реонот на патот кон Дрисла.